۸صبح، کونړ: ازادۍ جبهې ویلي چې ځواکونو یې د کونړ ولایت په څوکۍ ولسوالۍ کې د طالبانو پر یوې غونډې برید کړی او د دې ډلې یو جنګيالی یې وژلی دی.
دې جبهې د چهارشنبې پر ماښام د وږي پر ۱۸مه، پر اېکس ټولنیزې شبکې په یوه خبرپاڼه کې لیکلي چې دغه برید د پخوانۍ ملي اردو د کنډک پر دروازه د طالبانو پر جنګیاليو شوی دی.
د خبرپاڼې له مخې، په دغه برید کې يو طالب جنګيالی وژل شوی او دوه نور ټپیان شوي دي.
د ازادۍ جبهې په خبرپاڼه کې راغلي چې پر طالبانو دغه برید د سهشنبې پر شپه شاوخوا اته بجې شوی دی.
د ازادۍ جبهې په وینا، په دغو غلچکي عملیاتو کې د دې جبهې ځواکونو ته زیان نه دی اوښتی.
دا په داسې حال کې ده چې په دې وروستیو کې د طالبانو مخالفو جبهو د هېواد په بېلابېلو سیمو کې پر دې ډلې خپل بریدونه زیات کړي دي.
خو طالبانو په تېرو پنځو کلونو کې تل په افغانستان کې د خپلو مخالفو جبهو شتوالی رد کړی دی.
