۸صبح، کابل: د افغانستان د ازادۍ جبهې اعلان کړی دی چې په سرپل ولایت کې د دغې جبهې د ځواکونو د پوځي برید له امله پنځه طالب جنګیالي وژل شوي او ټپيان شوي دي.
دغې جبهې جمعه د تلې پر ۳مه، د یوې خبرپاڼې په خپرولو سره ویلي چې ځواکونو یې د تېرې پنجشنبې شپې شاوخوا ۱۰:۰۰ بجې د سرپل په مرکز کې د طالب جنګیالیو پر لومړۍ حوزه برید کړی دی.
د افغانستان د ازادۍ جبهې ویلي چې د دغو عملیاتو په پایله کې درې طالب جنګیالي وژل شوي او دوه نور ټپیان شوي دي.
د خبرپاڼې له مخې، دا برید هغه مهال شوی چې یو شمېر طالب جنګیالي د دغې حوزې دننه راټول شوي وو.
دغې جبهې د خپلو ځواکونو د احتمالي مرګ ژوبلې او د برید د څرنګوالي په اړه نور جزییات نه دي ورکړي.
دا په داسې حال کې ده چې د ازادۍ جبهې په ګډون د طالبانو مخالفو جبهو د دغې ډلې پر وړاندې خپل بریدونه زیات کړي او په یوه بله پېښه کې یې په کابل کې د درېیو طالب جنګیالیو د وژل کېدو او ټپي کېدو خبر ورکړی و.
