مينه کتاب د چاپ پر ګاڼه سنبال شو

مينه کتاب د نوموتي برازيلي ليکوال پاولو کويلو د کتابونو لنډو ښوونیزو پرګرافونو څخه را اخیستل شوي مطالب دي چې د یوه کتابګوټي په بڼه ترتیب شوي او د ځوان ژباړن ښاغلي حسيب الرحمن ساحل لخوا خوږې پښتو ته ژباړل شوي. ياد کتاب په ښکلي پښتۍ او ډيزاين سره تازه په تازه په کابل کې د اکسوس خپرندويې ټولنې او کتابپلورنځي لخوا د چاپ پر ګاڼه سنبال او بازار ته وړاندې شوی دی.
د کتاب ژباړن، ښاغلي حسيب الرحمن ساحل له ۸صبح پښتو مجلې سره په خبرو کې ددې کتاب په اړه داسې وويل: « «مینـه» کتاب د مینـې لارښـود دی. په دې کتـاب کې د رښتینې مینې کولو، د رښتینې مینې پر ارزښت پوهېدو او رښتینې مینې ته د رسېدو په اړه لنډې او ګټورې لارښوونې وړاندې شوې دي او د مینې رازونه د لنډو جملو په چوکاټ کې راوړل شوي دي».
ښاغلي ساحل د خپلو خبرو په دوام وويل چې، «مینه» کتاب مو د اصیلو او لنډمهاله مینو په توپیر پوهوي او د رښتینې مینې خوندونه، ارزښت او مقام درښيي. کتاب ولولئ، مینه وپېژنئ او د هغه چا د زړه له حاله خبر شئ چې رښتینې مینه پېژني، رښتینې مینه غواړي او په بدل کې رښتینې مینې ته اړتیا لري؛ خو دغو کسانو ته تر اوسه دا ډالۍ چا نه ده ورکړې. «مینه» کتاب مو ژوند کولو ته د رښتینې مینې پر بنسټ ژمن کوي او د ژوند پر بنسټيزه مانا مو پوهوي.