د سرحدونو قومونو او قبایلو چارو وزیر د دیورند کرښې په اړه د پاکستان د بهرنیو چارو د وزیر وروستۍ څرګندونې مغرضانه او د افغانستان په مسایلو کې لاسوهنه بللې ده.
محب الله صمیم د غبرګولي په ۳۱مه نېټه په خبري ناسته کې وویل چې د پاکستان د بهرنیو چارو وزیر شاه محمود قریشي دا نظر چې دیورند کرښه د نړیوالو له خوا په رسمیت پېژندل شوې کرښه ده، د افغانستان په کورنیو چارو کې لاسوهنه ده. د سرحدونو او قبایلو چارو وزیر جوته کړې چې د قریشي له څرګندونو ښکاري چې د افغانستان په وړاندې د پاکستان په دریځ کې هېڅ بدلون نه دی راغلی.
هغه وویل: «قریشي داسې څرګندونې کوي چې د یوه هېواد دیپلومات ته مناسبې نه دي.» صمیم زیاتوي، قریشي داسې خبرې کړې، لکه نوموړی چې د طالبانو ډلې ویاند وي. د سرحدونو چارو د وزیر په وینا، د پاکستان ستونزه دا ده چې له پياوړي افغانستانه وېره لري او تراوسه هم د ستراتیژيک عمق سیاست په لټه کې دی. صمیم له پاکستانه وغوښتل چې د ښه ګاونډیتوب اصل ته درناوی وکړي او د افغانستان په اړه له مغرضانه څرګندونو ډډه وکړي. د سرحدونو، قومونو او قبایلو چارو وزیر همداراز وویل چې افغانستان په تېرو درېیو لسیزو کې د پاکستان د نه اعلان شوې جګړې قرباني شوی او دا هېواد له طالبانو ملاتړ کوي.
محب الله صمیم په دې اړه د قریشي څرګندونې چې طالب مشران په افغانستان کې دي، رد کړې او وې ویل چې د طالبانو مشران په پاکستان کې اوسېږي او دا مسله له هېچا پټه نه ده.
شاه محمود قریشي د طلوع نیور له مسوول مدیر لطف الله نجفي زاده سره په مرکه کې ډیورند کرښه نړیواله پېژندل شوې پوله بللې ده.