۸صبح، کابل: د طالبانو د دفاع وزارت سرپرست محمدیعقوب مجاهد او لوی درستیز فصیحالدین فطرت د قطر له امیر تمیم بن حمد الثاني سره وکتل.
د طالبانو ویاند ذبیحالله مجاهد پنجشبنه د کب پر ۱۷مه په خپله ایکسپاڼه کې لیکلي چې په دې کتنه کې «د دواړو هېوادونو ترمنځ د اړیکو پر پیاوړتیا او په بېلابېلو برخو کې په پرمختګ» خبرې اترې شوې دي.
په دې کتنه کې محمدیعقوب مجاهد د قطر له همکاریو مننه کړې او د اړیکو د پراختیا ډاډ یې ورکړی دی.
د طالبانو د دفاع وزارت سرپرست او لوی درستیز تېره یکشنبه قطر ته تللي و.
له دې وړاندې هغوی د دغه سفر په لړ کې د قطر د دفاع له وزیر خالد بن محمدالعطیه سره د دوه اړخیزو اړیکو او «د تعلقاتو په لا پیاوړتیا» خبرې اترې کړې دي.
دمګړۍ قطر د افغانستان په سیاست کې مهم لوبغاړی بلل کېږي.
له طالبانو سره د قطر اړیکې د دغې ډلې د ظهور لومړیو کلونو ته ورګرځي؛ خو په قطر کې د طالبانو د سیاسي دفتر پرانېستل او د دوحې له خوا له دغې ډلې پراخ ملاتړ او بیا د امریکا او طالبانو ترمنځ د دوحې هوکړې لاسلیکېدلو وروسته دغه هیواد د افغانستان په تحولاتو کې د یو اغېزمن عامل په توګه بدل شوی دی.