۸صبح، کابل: د طالبانو د رژيم د اطلاعاتو او فرهنګ وزير ملا خیرالله خیرخواه داروپايي ټولنې له ځانګړي سیاسي استازي توماس نیکلسن او د دغې ټولنې له سفیرې رافیلا یودېچه سره د لیدنې پر مهال له افغاني رسنيو، رسنيزو بنسټونو او خبریالانو څخه د اقتصادي ملاتړ غوښتنه وکړه.
طالبانو په دې اړه نور وضاحت نه دی ورکړی، خو د دوی نا ليدل شوي مشر ملا هبت الله پر طالب چارواکو رسنيو کې نیوکې کول منع ګرځولي او ویلي، چې دغسې کار « ديني جواز» نه لري.
طالبان په خپله خبرپاڼه کې ادعا کوي، چې توماس نیکلسن د فرهنګي او تاریخي میراثونو د ساتنې، د بیان ازادۍ په ځانګړې توګه د رسنیزو تخطیو د څېړنې کمېسیون په تړاو د دوی د رژيم کړنې ستايلي دي.
طالب چارواکو په داسې مهال له اروپايي ټولنې د رسنیو، رسنيزو بنسټونو او خبریالانو په نوم د مرستې غوښتنه کړې، چې مخکې ېې له نړيوالې ټولنې څخه مرسته اخيستونکي رسنۍ او خبریالان یې« پردي اجیران» بلل او په دې پلمه يې پرې د بريدونو فتواوې ورکولې.
په وروستيو کې راپورونه ښيي، چې طالبانو خپل نفوذي کسان د رسنيو د ملاتړ په ځينو نويو بنسټونو کې ځای پر ځای کړي او په دې ډول د خبريالانو د ريښتيني غږ د مخنيوي تر څنګ د رسنيو او خبريالانو په نوم ممکنه امتيازات غواړي حيف و ميل کړي.
