۸صبح، کندهار: د کورنيو چارو وزير مسعود اندرابي د کندهار امنیتي وضعیت د ارزونې په موخه د روان کال د کب په ۲۶مه نېټه، نن سه شنبه د امنیتي پلاوي په مشرۍ یاد ولایت ته سفر وکړ.
د کورنیو چارو وزیر مسعود اندرابي چې په دغه سفر کې ورسره د دې وزارت د دفتر ، پېژنتون او جلب او جذب رئیسان هم ملتیا کوي کندهار ته د سفر پرمهال يې د لومړۍ او پنځمې امنیتي حوزو څخه لیدنه وکړه او د یادو حوزو د پولیسو ستونزې یې له نږدې څخه واورېدې او د حل په موخه یې د جدي اقداماتو د پورته کولو ژمنه وکړه.
دا په کندهار کې لومړی ځل دی چې د امنتي برخې لوړ پوړي مسؤلین د پولیسو له امنیتي حوزو څخه له نږدې لیدنه کوي.
مسعود اندرابي داسې مهال په ولايتي سفرونو بوخت دی چې په ټول هېواد کې د نوروز جشن د لمانځلو په موخه کلک امنیتي تدابیر نیول شوي دي.