۸صبح، کابل: «د افغانستان د ملي ازادۍ» په نوم ګوند چې مشري یې په مخکېني حکومت کې د ملي امنیت رییس رحمتالله نبیل کوي، ویلي چې د جلاوطنه حکومت د جوړېدو له نظریې څخه هغه مهال ملاتړ کوي چې په خبره یې، د ولسواکۍ اصول، د وګړو بنسټيز حقونه او ټولنیز عدالت پکې په پام کې نیول شوی وي.
نوموړي ګوند پنجشنبه د وږي پر ۲۹مه په یوې خپرې کړې اعلامیې کې لیکلي چې هر مشروع او قانوني – سیاسي بدیل دې د ملي اجماع، ټولنیز عدالت او د وګړو اساسي حقونو د تضمین پر بنسټ رامنځته شي.
یاد ګوند ټینګار کړی چې جلاوطنه حکومت دې د افغانستان نړیوال مشروعیت او سیاسي باور وساتي او په نړیوالو غونډو کې دې د افغانانو رښتینې استازولي وکړي.
د نوموړي ګوند په خبره، جلاوطنه حکومت دې د بدلون پړاو لپاره هر اړخیزه لار نقشه جوړه کړي او د سیاسي اصلاحاتو، ټولنیز پرمختګ او د نوي ټولنیز تړون رامنځته کولو لپاره دې پراخه طرحه ولري.
نوموړي ګوند په خپلې خپرې کړې اعلامیې کې د نړیوال مشروعت او سیاسي باور ساتنه، د پراخ بنسټه او ولسواکه جوړښت رامنځته کول او له بنسټپالنې او اورپکۍ سره مقابله د جلاوطنه حکومت جوړېدو ګټې یادې کړې دي.
د افغانستان د ملي ازادۍ ګوند زیاته کړې: «دا ګوند هغه مهال د جلاوطنه حکومت د جوړېدو له نظریې ملاتړ کوي چې د ولسواکۍ اصول، د وګړو اساسي حقونه او ټولنیز عدالت په جدي توګه پکې رعایت شوې وي.»
دا دریځ داسې مهال نیول شوی چې څو ورځې وړاندې د جنبش ګوند رییس عبدالرشید دوستم د جلاوطنه حکومت له جوړېدو ملاتړ کړی و.






