۸صبح، کابل: په هېواد کې پر هزارهګانو او شیعهګانو د محدودیتونو په لړ کې د طالبانو عدلیې وزارت په کابل ښار کې له ۱۵ کلونو کار وروسته، د خاتمالنبیین روغتون فعالیتونه،درولي دي.
سرچینو يکشنبه د لړم پر ۲۴مه، له ۸صبح ورځپاڼې سره په خبرو کې ویلي چې د طالبانو عدلیې وزارت پرون د خاتمالنبیین روغتون دروازه مهر و لاک کړې ده.
د خاتمالنبیین روغتون د امتیاز څښتن محمدجواد محسني تایید کړې چې د طالبانو عدلیې وزیر تېره اوونۍ د دغه روغتیايي مرکز د مدیریت د سپارلو غوښتنه کړې وه او خبرداری یې ورکړی و چې د مخالفت په صورت کې به یې فعالیتونه ودرول شي.
محسني زیاته کړې چې دا غوښتنه یې رد کړې، ځکه د عدليې وزير ته د یوه روغتیايي مرکز د ادارې د سپارلو لپاره هېڅ ډول قانوني بنسټ نشته.
ویل کېږي چې دغه روغتون په دې وروستیو کې د طالبانو د عامې روغتیا وزارت د ارزونې کمېسیونونو له خوا د معتبرو روغتونونو په ډله کې راغلی و.
د طالبانو چارواکو تر اوسه په دې اړه څه نه دي ویلي.
دا په داسې حال کې ده چې په تېره یوه میاشت کې د طالبانو له خوا د خاتمالنبیین د علمیه حوزې، د خاتمالنبیین پوهنتون، تمدن ټلوېزیون او راه فردا ټلوېزیون په ګډون د هزارهګانو او شیعهګانو اړوند ګڼ ښوونیز، کلتوري او رسنیز بنسټونه تړل شوي دي.
