جګړو، وچکاليو او اقتصادي ناخوالو په کندهار ښار کې د بې وزلو او سوالګرو مېرمنو شمېر زیات کړی دی. سوالګرې ښځې نه یوازې دا چې خپله خيرات ټولوي بلکي خپل اولادونه هم د خیرات ټولولو په موخه کاروي. د اقتصادي چارو شنونکو په وينا، په هېواد کې د خونړۍ جګړې دوام، تعليمي، روغتيايي او نورو اساسي حقونو ته نه لاسرسی، د کاري زمينو نشتون او په ټوله کې د خلکو اقتصادي وضعيت د ښه کېدو په موخه د منظمې او دومداره برنامې نشتون هغه څه دي چې خلک او په ځانګړي ډول مېرمنې او ماشومان دې اړ کوي چې سوالګرۍ ته مخه کړي.
سوالګرې مېرمنې فاطمه او ملکه وایي، د کورنيو سرپرستان يې په جګړو او نورو پېښو کې له لاسه ورکړي او اوس اړ دي چې د خپلو اولادونو د ساتنې لپاره له خلکو خيرات وغواړي.
فاطمه او ملکه دوه هغه ښځې دي، چې خپل خاوندان يې له لاسه ورکړي او اوسمهال د خپلو کورنيو د اړتياو پوره کولو په موخه ګدايي کوي.
سوالګرې فاطمې ۸صبح سره په خبرو کې وویل: «خاوند مې مړ دی، یو لس کلن زوی لرم او په کور کې په مخدره توکو روږدی يو لېور لرم چې اوس هم په کور کې په ځنځيرنو تړلی دی. زه څوک نه لرم چې خواري راته وباسي، ماته هم کار نه پیدا کیږي، نو مجبوره یم چې د ښار په واټونو کې خیرات ټول کړم.
ټوله ورځ به لوږه تېروم او په دې هیله ناستې یم چې خلک راته يو څه راکړي او کور ته یې د بچیانو لپاره یوسم.»
ملکه د کندهار ښار بله سوالګره مېرمن هم د ورته برخليک سره مخ ده، هغه وايي چې په جګړو کې یې د کورنۍ زیات نارینه غړي له لاسه ورکړي دي.
ملکه وايي: «څه وکړم، خاوند مې علول دی او د خوارۍ ويستلو نه دی، ما هم د کار موندلو لپاره زیاتې هڅې کړي خو کار مې نه دی پیدا کړی، نو مجبوره يم چې د ښار پر واټونو له خلکو خيرات ټول کړم. په روانو جګړو کې مو د کورنۍ ۷ کسه نارینه وژل شوي دي او په کور کې د ګټې وټې بل څوک نه لرم.»
په ورته وخت کې د کندهار د ښځو چارو رئیسې، روقيې اڅکزۍ له ۸صبح سره په خبرو کې وويل چې، د وروستۍ سروې له مخي يې په دې ولایت کې ۲۵۰ داسې مېرمنې معلومې کړي چې، د زيات مجبوريت او د خپلو کورنیو د سرپرستۍ او ساتنې په موخه يې خيرات ټولولو ته مخه کړې ده.
مېرمن اڅکزۍ زياته کړه، کندهار ولایت کې د پخوا په پرتله د سوالګرو مېرمنو شمېر زيات شوی دی.
هغه وايي، د ښځو چارو رياست دې اندېښنې ته په کتو ښه له ولایتي ادارې سره په همغږۍ په دې کار کوي چې يادو مېرمنو ته د حرفهوي پروګرامونو زمينه برابره کړي.
د ښځو چارو رئیسې روقیې اڅکزۍ زياته کړه: «په خواشينۍ سره د پخوا په پرتله کندهار ښار کې د سوالګرو ښځو شمېر زیات شوی او دغه موضوع مو د کندهار ولايت مقام سره شریکه کړې ده، څو په کندهار کې د مرستندويه بنسټونو په مرسته ژر تر ژره د ښځو لپاره د حرفوي زدهکړو پروګرام پيل کړي چې دغه سوالګرې مېرمنې جذب کړي او حرفوي زدهکړې تر لاسه کړي.»
نوموړې ډاډ ورکوي چې، دغه مېرمنې به د يادې برنامې له لارې د خپلې خوښې وړ حرفې زده کړي او وروسته به خپلو کورنو کې د خپلو کورنيو ترڅنګ کار کوي او له دې لارې به خپلې ړړتياوې پوره کوي.
دوامداره جګړې، وچکالي او کورنی تاوتريخوالی هغه عمده لاملونه دي، چې ماشومان او مېرمنې يې سخت کار او حتی خيرات ټولولو ته اړي کړي دي. د اقتصادي چارو شنونکو په وينا، د جګړې قربانيانو له کورنيو سره دومداره مرستې او دوی ته د کار زميې برابرول، د اړوندو بنسټونو له لوري د بې وزله وګړو سره دوامداره همکاري او له دوی څخه دوامداره ملاتړ هغه څه دي چې د سوالګرو په کمووالي کې اغېزناک ثابت کېدای شي.
