۸صبح، کابل: په پروان کې د یونیسف په مالي ملاتړ د اوبو رسولو د څلورو شبکو چارې د ۷.۹ میلیونو ډالرو په لګښت پیل شوې دي.
باختر خبري اژانس یکشنبه د وږي پر ۲۹مه راپور ورکړی چې دا شبکې د شیخ علي ولسوالۍ په قومغي کلي، د شینوارو ولسوالۍ په صوفي خېل کلي او د بګرام ولسوالۍ په دولت شاهي او مهاجرینو ښارګوټو کې رغول کېږي.
د راپور له مخې، ټاکل شوې چې د دغو شبکو د بیارغونې چارې په څلورو میاشتو کې بشپړې شي.
طالبانو ویلي چې د دغو پروژو په بشپړېدو به یو زرو ۱۵۶ کورنیو ته د څښاک پاکې اوبه برابرې شي.
دا په داسې حال کې ده چې د افغانستان ګڼې لرې پرتې سیمې د څښاک پاکو اوبو ته اړین لاسرسی نه لري او اوسېدونکي یې له لرې ځایه د اړتیا وړ اوبه برابروي.
