د ټولګټو وزارت وايي چې د کونړ – نورستان سړه کې په څو پړاوونو کې رغوي.
د ياد وزارت لخوا په خپرې شوې خبرپاڼه کې راغلي دي چې، د کونړ – نورستان سړک له چپې درې ولسوالۍ څخه پيل او د نورستان ولایت تر پارون ښار پورې غځيږي چې مجموعا ۱۰۷ کیلو متره اوږدوالی لري او رغنیزې چارې یې په څو پړاوونو کې تر سره کيږي.
د خبرپاڼې له مخې د دې سړک ۲۲ کیلو متره برخه اوس مهال په نورستان ولایت کې تر کار لاندې ده چې پر دوو برخو وېشل شوې؛ لومړۍ برخه یې ۱۱.۷ کیلو متره اوږدوالی لري چې دا مهال یې چارې ۵۶ سلنه پرمخ تللې او دویمه برحه یې د ۱۰ اعشاریه ۳ کیلو متره اوږدوالي په درلودلو سره ۲۶ سلنه کاري پرمختګ لري.
خبرپاڼه زياتوي، د دې سړک د پاتې ۶۲ کیلو متره برخې ډیزاین هم بشپړ شوی او د تدارکاتي پړاوونو د ترسره کولو په موخه د ټولګټو وزارت لخوا د تدارکاتو ملي ادارې ته استول شوی دی.
د ټولګټو وزارت وايي چې، د یاد سړک ۲۳ کیلومتره برخه چې وړاندې جوړه شوې وه اوس مهال يې ترمیم او بيار رغونې چارې په پلان کې دي چې چارې به یې په نږدې وخت کې پیل شي.
نورستان چې یو غرنی ولایت دی، وړاندې یې د سړک جوړېدو ته پام نه و شوی او نه یې هم په اساسي ډول جوړ شوی سړک درلود خو ټولګټو وزارت اوس مهال د لومړي ځل لپاره د ولسونو د هوساینې لپاره د نورستان ملي پارک ته ورغځېدلې لار په اساسي ډول رغوي چې په بشپړېدو سره به یې د نورستان خلک له ګڼو اسانتیاوو څخه برخمن شي.
د يادنې وړ ده چې له کمکي اختر وروسته په يوې اونۍ کې له نورستان ملي پارک څخه شاوخوا ۷۰۰۰ سيلانيانو ليدنه کړې وه، خو ډېری سيلانيانو چې له دغه ولايته يې له ليدنه کړې وه، د لارې د خرابوالي له امله يې نيوکې درلودې. په ورته وخت کې د ياد ولايت چارواکو هم دغه ستونزې منلې وه او ويلي ؤ چې د اړوندو وزارتونو او ادارو په همغږۍ د يادې لارې د جوړو او پخولو لپاره يې هڅې روانې دي.
