په ابوظبۍ کې د روسیې، امریکا او اوکرایین ترمنځ د مذاکراتو دویمه ورځ له نږدې دوو ساعتونو خبرو وروسته، د تړلو دروازو تر شا پای ته رسېدلې ده.
ټاس خبري اژانس چهارشنبه د نومبر پر ۱۱مه راپور ورکړی چې دا مذاکرات د نومبر له ۱۰مې پیل شوي او د درېیو هېوادونو پلاوو په بېلابېلو اختلافي مسایلو خبرې کړې دي.
د روسیې د پلاوي مشري د دغه هېواد د ولسمشر مرستیال ولادیمیر مدینسکي او د اوکراییني پلاوي بیا د دغه هېواد د بهرنیو استخباراتو ادارې رییس رستم عمروف کوي.
د مذاکراتو په پیل کې امریکايي استازو سټیو ویټکاف او جرد کوشنر، په اروپا کې د ناټو د متحدو ځواکونو لوی قوماندان او د متحده عرب اماراتو د بهرنیو چارو وزیر عبدالله بن زاید آل نهیان هم ګډون کړی و.
د راپور له مخې، د خبرو لومړی پړاو څلور نیم ساعته دوام وکړ او په منځ کې یې ۴۰ دقیقې وقفه هم وشوه، دویم پړاو هم د خبریالانو له حضور پرته د تړلو دروازو تر شا ترسره شو.
د کرملین ویاند دیمیتري پسکوف ویلي، روسی پلاوی د خبرو د بهیر په اړه په دوامداره توګه د دغه هېواد ولسمشر ولادیمیر پوتین خبروي.
نوموړي ټینګار کړی چې روسي پلاوي د دغو خبرو په لړ کې د اروپايي هېوادونو له استازو سره هېڅ ډول اړیکه نه لرله.
