۸صبح، کابل: طالبانو د افغانستان، ایران او تاجکستان ترمنځ د ځمکني ټرانسپورټ د درې اړخیزدهلېز د رامنځته کېدو خبر ورکړی او ویلي یې دي چې دا ګام د ټرانزیټي همکاریو د پراختیا په موخه اخیستل کېږي.
د طالبانو د ټرانسپورټ او هوايي چلند وزارت پنجشنبه د چنګاښ پر ۲۵مه د یوې خبرپاڼې په خپرولو سره ویلي چې د دغه وزارت د ځمکني ټرانسپورټ د قوانینو او تړونونو رییس یارمحمد رمضان د ایران په مشهد ښار کې د طالبانو، ایران او تاجکستان په درې اړخیزه غونډه کې ګډون کړی دی.
په دې غونډه کې د طالبانو، ایران او تاجکستان ترمنځ د لېږد رالېږد د همکاریو پر پراختیا، د ټرانسپورټي اړیکو پر پراخیتا او نورو اړوندو موضوعاتو بحث او خبرې اترې شوې دي.
د طالبانو د ټرانسپورټ او هوايي چلند وزارت ویلي چې په دې ناسته کې د ځمکني ټرانسپورټ د درې اړخیز دهلېز پر رامنځته کولو هوکړه شوې ده.
د دې هوکړې پر بنسټ، ټاکل شوې ده چې د ایران او تاجکستان سوداګریزې جوپې د افغانستان د خاورې له لارې ټرانزېټ او ولېږدول شي.
