۸صبح، کابل: طالبانو ویلي چې په فراه کې د شاوخوا ۲۰۷ میلیونو افغانیو په ارزښت د مرمر ډبرو کان د استخراج چارې پیل شوې دي.
باختر خبري اژانس یکشنبه د تلې پر ۵مه راپور ورکړی چې دا کان د فراه د مرکز اړوند د خرمالق سیمې په «ګرمآب» کلي کې دی.
په فراه کې د طالبانو د کانونو او پټرولیم آمر عبدالستار مسلم ویلي چې د دغه کان د استخراج چارې د پنځو کالو لپاره په ۲۰ هکټاره مساحت کې پیل شوی دی.
د نوموړي په خبره، په لومړي پړاو کې به شاوخوا ۵۰ زره ټنه مرمر ډبرې استخراج شي.
هغه زیاته کړې چې په دویم پړاو کې به ۸۰ زره ټنه او په راتلونکو کالو کې به ۱۰۰ زره ټنه مرمر استخراج شي.
دا په داسې حال کې ده چې د طالبانو له واکمنېدو وروسته په بېلابېلو ولایتونو کې د کانونو د استخراج بهیر پراخ شوی دی.
