۸صبح، ارزګان: د ارزګان سیمهییزې سرچینې وايي چې طالبانو د دغه ولایت د «خاص ارزګان ولسوالۍ» اته اوسېدونکي د يوه ديني عالم د وژنې د رسنیز کېدو په تور نیولي دي.
سرچینې سېشنبه د زمري پر ۲مه، ۸صبح ورځپاڼې ته ویلي چې طالبانو دا کسان درې ورځې دمخه د دغې ولسوالۍ په «ششپر» کلي کې د یو هزاره ملا، رستم رحیمي د وژنې د رسنیز کولو په تور نیولي دي.
سرچينې وايي، نيول شوي کسان روحالله حسيني، طاهر مرادي، مستري داوود، ضياء او فرزاد نومېږي او زياتوي چې د درېيو نورو هويت نه دى په ډاګه شوى.
سرچینې د چنګاښ پر ۳۰مه، ۸صبح ورځپاڼې ته ویلي و چې په ششپر کلي کې یو هزاره، ملا رستم رحیمي د طالبانو په یونیفورم کې د وسلهوالو کسانو له خوا ووژل شو.
په ارزګان کې طالبانو تر اوسه د نوموړي ملا د وژنې په تړاو څه نه دي ويلي.
سرچينې ادعا کوي چې دا د طالبانو تر بیاځلې واکمنېدو وروسته په دغې ولسوالۍ کې ٢١مه وژنه ده.
