۸صبح، هرات: په هرات کې ځایي سرچینې وایي، طالبانو د دغه ولایت یو شمېر اوسېدونکی تراویح لمانځه کې نه ګډون له امله، وهلي ډبولي دي.
نن پنجشنبه، د وري په ۱۰مه، سرچینې ۸صبح ورځپاڼې ته وايي، چې طالبانو دغه کسان تېرو دوو شپو په اوږدو کې، د هرات ښار په ۱۱مه ناحیه کې وهلي دي.
د يوولسمې ناحيې د اوسېدونکو په وينا، په وهل شويو کسانو کې يو شمېر درملتونوال، هټیوال او ځايي اوسېدونکي شامل دي.
طالبانو تر اوسه په دې اړه څه نه دي ویلي.
د يادونې وړ ده، چې طالبانو تر دې وړاندې د هېوادوالو د عقايدو تفتيش په لړ کې، د مزارشريف ښار د ګذر له وکيلانو غوښتي وو، چې د «روژه خوړونکو» نوملړ چمتو او دوی ته وسپاري.
