۸صبح، کابل: د ملګرو ملتونو د ماشومانو وجهي صندوق یا یونیسف له زدهکړو د نجونو د محرومیت درېیم کال په مناسبت وايي چې دا بنسټ له دوی خپل ملاتړ ته دوام ورکوي.
یونیسف چهارشنبه د وږي پر ۲۸مه، اېکس پاڼه کې د یوې اعلامیې په خپرېدو سره لیکلي چې طالبانو له درېیو کلونو راهیسې ۱.۵ میلیونه نجونې د زدهکړو له حقه بې برخې کړي دي.
د دغه بنسټ په وينا، د روان کال په ترڅ کې به ٣٨ زره نورې ښځينه زدهکوونکي د شپږم ټولګي تر پای ته رسېدو وروسته له زدهکړو بې برخې شي.
په اعلامیه کې راغلي: «تحصیل د هر ماشوم حق دی او د نجونو او هلکانو د ژوندي پاتې کېدو، پرمختک او د هغوی راتلونکې لپاره د ښو پرېکړو کولو زمینه برابروي.»
یونیسف ټینګار کړی چې له لومړي تر شپږم ټولګي د یو میلیون نجونو په ګډون له ۲.۱ میلیونه ماشومانو څخه خپل ملاتړ ته دوام ورکوي.
د دغه نړیوال سازمان د معلوماتو له مخې، دا مهال په افغانستان کې ۲.۳ میلیونه نجونې په لومړنیو ښوونځیو کې پر زدهکړو بوختې دي.
تر دې مخکې د بشري حقونو څار بنسټ د طالبانو له خوا د نجونو پر زدهکړو د بندیز په هکله د نړیوالې ټولنې پر چوپتیا نیوکه کړې او په وینا یې، یو شمېر هېوادونه او نړیوال بنسټونه دې موضوع ته ارزښت نه ورکوي.
