د ۸صبح د معلوماتو له مخې، طالبانو د ننګرهار بهسودو ولسوالۍ اړوند د فارم هډې سیمې «فارم هډې او حفاظه» کليو څخه شاوخوا دوه سوه کورنۍ د دې له لپاره د خپلو مېنو پرېښودو ته اړ کړي، چې ګواکې دا د کانال اړوند سیمه ده. که څه هم دغه سیمه د کانال ریاست اړوند ده؛ خو طالبانو ترې عام خلک ایستي او اوس یې په کې د خپلو جنګیالیو یو شمېر کورونۍ ځای پر ځای کړې دي. دې سیمې ته د ۸صبح خبریال تللی او د یو شمېر کورنیو له غړو سره تر خبرو وروسته یې څرګنده کړې، چې په دې سیمه کې ډیری هغه کورنۍ مېشتې وې چې پخواني حکومت کې یې دندې لرلې.
خلکو ۸صبح ورځپاڼې ته ویلي، طالبانو د دې لپاره له سیمې څخه ورته د وتلو امر کړی، چې ګواکې دوی په یادو سیمو کې باغونه جوړوي؛ خو په وینا يې د طالب جنګیالیو کورنیو ته څوک هېڅ هم نه وايي.
دوی وايي، طالبانو ته یې ډېر عذرونه وړاندې کړي؛ خو څوک یې غږ نه اوري. سلیم چې پخوا په حفاظه کلي کې اوسېده وايي، اړ شوی چې خپل کور یوې لرې پرتې سیمې ته انتقال کړي.
دی وايي، په بد اقتصادي وضعیت کې یې په یاده سیمه کې کور جوړ کړ؛ خو د طالبانو له راتګ وروسته ورته وویل شول، چې نور په دې سیمه کې نه شي اوسېدلای.
هغه ګیله من دی، چې یوازې عام خلک له یادې سیمې څخه ووېستل شول او لاهم د طالب جنګیالیو او هغو خلکو کورونه مېشت دي چې اړوندو چارواکو ته په زیاته کچه پیسې ورکوي.
نوموړی وايي:« طالبانو شاوخوا دوه میاشتې موږ ته وویل چې په دې سیمه کې باغونه جوړوو او تاسې ورنه خپل کورونه بار کړئ، موږ څو ځله د دوی مشرانو ته ورغلو؛ خو کومه پایله یې ورنکړه، اخر مجبور شوو، چې له سیمې ووځو، موږ سره خوا په خوا د طالبانو کورونه هم وو، موږ فکر کاوه، چې ټول به وباسي؛ خو وروسته څرګنده شوه چې یوازې موږ راوتلي یوو، او اوس هم هلته طالبان اوسي، هیڅوک ورته څه نه وايي.»
په ورته وخت کې صابر چې د جمهوریت پر مهال یې په ملي اردو کې دنده کوله وايي، له اوږدې مودې راهیسې په یاده سیمه کې ژوند کوي؛ خو کله چې طالبانو واک ونیوه، نو وخت په وخت به یې په یوه او بله پلمه ورغوښت او ګواښه به یې، چې په دې موده کې یې څو ورځې بند هم تېر کړی.
هغه که څه هم باور نه لري؛ خو وايي، له دې سیمې څخه د دوی د وتلو یو لامل ښايي دا وي، چې په تېر حکومت کې یې دنده ترسره کړې وه.
د صابر په وینا، طالبانو ته یې څو ځله ویلي چې د دې ځای په بدل کې ورته کوم بل ځای ورکړي، خو هغوی یوازې ورته ویلي چې دا د دوی مسوولیت نه دی او په بیه دې ځانته کور واخلي.
هغه له ۸صبح سره په خبرو کې وویل:« هلته مو د غریبۍ ژوند لرلو، خو اوس ترې راغلي یوو، زه اوس په کامې ولسوالۍ کې اوسم، دلته هم پردی کور دی، ډېر سخت ژوند لرم، موږ که څه هم طالبانو ته وویل، چې په سیمه کې مو د یو وخت لپاره پرېږدي، خو د هغوی دلیل دا وه، چې دولتي ځمکه مو نیولې ده.
که ځمکه دولتي وي، نو بیا باید د ټولو لپاره وي؛ خو له بده بخته، پر هماغه ځای کې اوس طالبان اوسي، هیڅوک ورته څه نه وايي، زه فکر کوم موږ یې په دې خاطر را شړلي یوو چې پخواني حکومت کې مو دنده لرله.»
له دې سره جوخت د طالبانو لپاره د ننګرهار د کانال ریاست چارواکي وايي، پر دې ځمکه مېشت خلک په غیر قانوني توګه اوسېدل؛ نو ځکه یې شړلي دي.
د ننګرهار د کانال رئیس عبدالرحمن کظیم ویلي، څو ځله یې دې خلکو ته ویلي، چې د ځان لپاره مناسب ځایونه ولټوي.
د هغه په خبره، دا خلک د کانال پر ځمکه پراته وو، چې له ډېر غور وروسته دې پرېکړې ته ورسېدل، څو له دې سیمې څخه یې وشړي.
نوموړي زیاته کړه: « دلته سلګونه جریبه ځمکه وه چې خلکو په غیر قانوني توګه نیولې وه، موږ بیرته راوګرځوله او ټول خلک مو وشړل، پلان لرو، چې په دې ځمکه کې بېلابېل باغونه وکرو.»
نوموړي د ۸صبح د دې پوښتنې په ځواب کې چې ولې یې پر یاده ځمکه د طالب جنګیالیو کورونه پریښي؟ چوپتیا غوره کړه.
د ویلو ده، چې طالبانو د کانال اړوند یوازې د فارم هډې له سیمې ۲۷۵ کورنۍ په جبري ډول کډوالۍ ته اړ کړي، چې اوس یې یو شمېر د بهراباد وروستۍ برخې، ځینې کامې او ځینې نورې یې بیا سیاه سنګ ښارګوټي ته تللې دي.