۸صبح، کاپیسا: سیمهییزې سرچینې وايي چې طالبانو د جواد په نوم د مخکېني حکومت یو نظامي چې د کاپیسا د نجراب ولسوالۍ د «دره حضرت فرخشاه» اوسېدونکی دی، نیولی دی.
سرچینو یکشنبه د وږي پر ۲۹مه له ۸صبح ورځپاڼې سره په خبرو کې وویل چې جواد شاوخوا ۱۰ ورځې وړاندې لادرکه شوی و او نن یې له څو ورځو ناخبرۍ وروسته خپلې کورنۍ ته خبر ورکړی چې نیول شوی دی.
د سرچینو په خبره، د جواد مبایل د طالبانو تر څار لاندې دی او ځينې ملګري یې هم وروسته له هغې نیول شوي چې له جواد سره یې د مبایل له لارې اړیکې لرلې.
سرچینې زیاتوي چې جواد د مخکېني افغان حکومت په امنیتي ځواکونو کې دنده لرله.
ورته مهال سرچینې وايي چې د جواد ورور هم په نجراب ولسوالۍ کې د طالبانو غړی دی او د کورنۍ د ناوړه اقتصادي وضعیت له امله یې د هغه مېرمن او ماشومان له ځان سره بیولي دي.
داسې اندېښنې شته چې ښايي یو شمېر نور پخواني نظامیان او هغوی چې له جواد سره یې اړیکې لرلې، هم د نیول کېدو له ګواښ سره مخ وي.
تر اوسه د جواد د ساتل کېدو د ځای، د هغه د نیول کېدو د لامل او د ملګرو د وضعیت په اړه یې نور جزییات نه دي ترلاسه شوي.
دا په داسې حال کې ده چې طالبانو له بیا واکمنېدو وروسته د تېر حکومت ځينې پوځیان نیولي دي.
