۸صبح، کابل: د لغمان سیمهییزې سرچينې وايي چې طالبانو په دغه ولايت کې يو شمېر ځوانان د دغې ډلې له رژيم څخه ملاتړ ته هڅولي دي.
سرچينو یکشنبه د لیندۍ پر ۱۸مه ۸صبح ورځپاڼې ته وویل چې د لغمان لپاره د طالبانو د اطلاعاتو او کلتور رئیس تېره ورځ له يو شمېر ځوانانو سره ناسته کړې او له هغوى يې غوښتي چې د دغې ډلې په ګټه تبليغات وکړي.
د سرچينو په وینا، د لغمان د اطلاعاتو او کلتور رئیس عبدالنور رسولي ټينګار کړى چې د دغې ډلې د واک د بقا لپاره د عامه افکارو تبليغ او کنټرول ته اړتيا ده.
دغې ډلې د یاد ولايت له ځوانانو غوښتي چې په منظم ډول د اطلاعاتو او کلتور رياست په غونډو کې ګډون وکړي.
طالبانو له دې مخکې په ولایتونو کې له خبریالانو غوښتي وو څو د دغې ډلې په ګټه تبلیغات وکړي.
طالبانو د خپلې واکمنۍ له تېرو درېیو کلونو راهیسې د دغې ډلې منتقدان ځپلي او د زور له لارې یې خپل پروګرامونه پر خلکو پلي کړي دي.
