۸صبح، ننګرهار: په ننګرهار کې ځايي سرچینو د جلالاباد ښار د «انګورباغ» پر سیمه د طالب جنګیالیو د چاپې او د خلکو د کورونو د جبري تخلیې خبر ورکړی دی.
سرچینو شنبه د تلې پر ۱۸مه، له ۸صبح ورځپاڼې سره په خبرو کې تایید کړې چې د طالبانو جنګیالیو نن غرمه د جلالاباد ښار د څلورمې ناحیې په «انګورباغ» سیمه کې لږ تر لږه ۴۰ کورونه په زور تخلیه کړي دي.
د سرچینو په وینا، د سیمې اوسېدونکي، سره له دې چې قانوني اسناد او شرعي قبالې لري او له شاوخوا څلورو لسیزو راهیسې په دې سیمه کې اوسېږي، د طالبانو له لوري د خپلو کورونو د تخلیې له امر سره مخ شوي دي.
سرچینې وايي، طالبانو د اوسېدونکو د ملکیت اسنادو ته له پام پرته د سیمې ځمکې د یوه کوچي شخصي ملکیت بللی دی. د سرچینو په وینا، دغه کس د طالبانو د سرې میاشتې ادارې د رییس شهابالدین دلاور له نږدې کسانو دی او طالبانو د همدې ادعا پر بنسټ د کورونو د تخلیې امر صادر کړی دی.
سرچینې ټینګار کوي چې اوسمهال د سیمې سلګونه اوسېدونکي چې ښځې او ماشومان هم پکې شامل دي، په ازاده فضا کې بېبرخليکه پاتې دي.
