۸صبح، تخار: په تخار ولایت کې سرچینې وايي چې طالب جنګیالیو په دغه ولایت کې یو پخوانی نظامي د هغه د مور او مېرمنې د سترګو پر وړاندې په ډزو وژلی دی.
سرچینو دوشنبه د تلې پر ۶مه، له ۸صبح ورځپاڼې سره په خبرو کې وویل چې دا پخوانی نظامي احمدفرید کوهستاني نومېده او ورسج ولسوالۍ اوسېدونکی و.
د سرچینو په وینا، نوموړي په تېر حکومت کې د تخار د مرکز تالقان ښار د پنځمې امنیتي حوزې د پولیسو د افسر په توګه کار کاوه.
سرچینې زیاتوي چې دا پېښه د یکشنبې په ورځ د تلې پر ۵مه، په ورسج ولسوالۍ کې شوې ده.
تر اوسه د دغه پخواني نظامی د وژل کېدو انګېزه او لامل څرګند نه دی.
دا په داسې حال کې ده چې د طالبانو له بیا واکمنېدو وروسته، د تېر حکومت له نظامیانو او کارکوونکو سره د ناوړه چلند او د هغوی د وژنو ګڼ راپورونه خپاره شوي دی.
