۸صبح، بلخ: په بلخ کې ځايي سرچینې وايي چې طالبانو په دغه ولایت کې له هغې وروسته «له معلولانو د ملاتړ ملي موسسې» چارې وځنډولې چې په خبره یې، د دغې موسسې د مسوول محمداکرم حسینزاده نیول کېدل رسنیز شول.
سرچینو یکشنبه د زمري پر ۲۱مه ۸صبح ورځپاڼې ته ویلي چې په بلخ کې د طالبانو اقتصاد ریاست «له معلولانو د ملاتړ ملي موسسې» مسوولان ورغوښتي او د دغې موسسې د چارو ځنډولو پرېکړه یې ور اورلې ده.
شاوخوا دوه میاشتې وړاندې په بلخ کې د طالبانو استخباراتو محمداکرم حسینزاده ونیوه او کورنۍ یې د لومړۍ حوزې استخباراتو له فشار وروسته جبري کډه کولو ته اړ شوه.
نوموړي په تېرو جګړو کې يوه پښه له لاسه ورکړې او په مخکېني حکومت کې یې د معلولانو د حقونو د ترلاسه کولو په برخه کې فعالیت کاوه.
طالبانو په خپله نږدې درې کلنې واکمنۍ کې د ځینو کورنیو او بهرنیو موسسو چارې ځنډولې دي.
