پر کندهار ښار د طالبانو بريد پر شاه وتمبول شو

وسله والو طالبان نن جمعه سهار کندهار ښار ته د دننه کېدو هڅه وکړه خو د افغان امنیتي او دفاعي ځواکونو له لوري یې مخه ونیول شوه.
نن د ورځې له پیله وسله والو طالبانو د کندهار ښار اوومې امنیتي حوزې په مربوطاتو کې د میربازار له لارې غوښتل چې ښار ته دننه شي او د دې ولایت محبس ته ځان ورسوي، چې ورسره سم د امنیتي او دفاعي ځواکونو او طالب وسله والو تر منځ په سیمه کې جګړه پيل شوه.
د کندهار والي روح الله خانزاده د جګړې له سیمې څخه په یوه ويډویي کلېپ کې د کندهار اوسېدونکو ته په داسې حال کې ډاډ ورکړ چې د کمانډو ځواکونو قومندان او نور نظامي چارواکي ورسره ولاړ ؤ. هغه وويل چې وسله وال طالبانو ته به اجازه ورنکړي څو کندهار ښار ته دننه شي.
نوموړي زياته کړه چې وسله والو طالبانو تبلیغاتي جګړه پیل کړې او له دې لارې غواړي د خلکو په منځ کې وېره خپره کړي.
دا په داسې حال کې ده چې تېره شپه وسله والو طالبانو د کندهار – سپين بولدک لویه لاره بنده کړې وه او هلته یې د افغان امنيتي او دفاعي ځواکونو پوستې هم نیولي دي او په ورته وخت کې یې د کندهار ښار او ژېړې ولسوالۍ ترمنځ یو پل هم ویجاړ کړی دی.
وسله والو طالبانو د کندهار د روان وضعیت په اړه لا  تر اوسه رسنیو ته څه نه دي ویلي.