په هېواد کې د کورونا درېيمه څپه

په دې ورځو کې یو ځل بیا د کورونا ویروس د مثبتو بېلګو د زیاتوالي رپوټونه ورکول کېږي. د عامې روغتیا وزارت د شمېرو له مخې، یوازې په څلرویشتو ساعتونو کې کابو ۸۵۰ تنه په دغه ویروس اخته شوي چې له هغې ډلې ۲۵ تنه مړه شوي دي. په افغانستان کې د کورونا د درېيمې څپې خپرېدل د غويي میاشتې په نیمايي کې تایید شوي و.
په افغانستان کې د کورونا ویروس د لومړنیو بېلګو له لیدل کېدو یو کال او درې میاشتې تېرېږي. په دې موده کې هڅې شوې چې خلک له دغه ویروس سره د مبارزې لپاره روغتیایي سپارښتنو ته پام وکړي خو داسې ښکاري چې هېوادوال دغو سپارښتنو ته دومره پام نه کوي او هغه بابېزه او هسې اوازې ګڼي. همداراز ځینې بیا وايي چې د کورونا ویروس واکسین د انسان روغتیا ته زیان رسوي او آن ځینې ناروغۍ رامنځته کوي. ډېری وګړو د همدې ګونګوسو له امله له واکسین کولو ډډه کړې ده. ځینې بیا دا واکسین ګټور نه بولي چې دغې بې پامۍ د ویروس د لاخپرېدو لپاره زمینه برابره کړې ده.
ځینې خلک په دې اند دي چې کورونا وژونکې نه ده او یو شمېر کورنۍ بیا د دغه ویروس له امله د خپلو غړو مړینه پټوي او د مړینې لامل نورې ناروغۍ ګڼي.
څېړنو ثابته کړې چې وګړي په خپله د کورونا ویروس په خپرېدو کې مهم رول لري، له همدې امله تل سپارښتنه شوې چې له ګڼې ګوڼې ډډه وشي، لاسونه د ورځې څو ځله په اوبو او صابون پرې مینځل شي او له کورونو بهر ماسک وکارول شي. ددغو روغتیايي سپارښتنو موخه دا ده چې د کورونا ویروس د لاخپرېدو او یو بل ته یې د سرایت مخه ونیول شي. خو داسې ښکاري چې د ودونو، قران کریم د ختمونو او فاتحو په مراسمو، ښوونځیو، پوهنتونونو، بازارونو او موټرو کې هېڅ ډول روغتیايي تدابیر نه ترسترګو کېږي. نو ښکاره ده چې په دې ډول حالاتو کې زیانمنونکي وګړي تر ډېره له خطر سره مخامخ دي.
اوس چې د کورونا ویروس درېيمه څپه خپره شوې بایده دي چې د عامې روغتیا، حج او اوقاف، د پوهنې، لوړو زده کړو او نور وزارتونه او بنسټونه د عامه پوهاوي په برخه کې لازیاتې هڅې وکړي. د کورونا په وړاندې واکسین او د روغتیايي سپارښتنو عملي کولو ته خلک وهڅوي، ځکه د عامه پوهاوي په لوړولو سره ددغه ویروس ګواښ کمېدای شي.
ددې ترڅنګ د عامې روغتیا وزارت باید د لا بدو شرایطو لپاره چمتووالی ولري، ځکه په ټولنه کې د بې پامۍ کچې ته په پام سره که دغه ویروس لا پراخ شي ښايي وضعیت خراب شي، نو اړتیا ده چې دا وزارت په کورونا ویروس اخته وګړو ته د غوره خدماتو د وړاندې کولو لپاره خپل ټول امکانات وکاروي او همداراز هڅه وکړي چې د دغه ویروس د واکسینو د تطبیق لړۍ هم پراخه کړي. خلک هم باید ددغه ویروس په وړاندې مبارزه کې پراخه او هراړخیزه همکاري وکړي.