د ملګروملتونو له خوا په افغانستان کې د هدفي بريدونو د بندېدو غوښتنه وشوه

د ملګروملتونو امنيت شورا په افغانستان کې د ملکي وګړو پر وړاندې هدفي بريدونه غندلي دي. دغې شورا د بين‌ الافغاني مذاکراتو له پيلېدو وروسته د تاوتريخوالي او بريدونو د زیاتېدو په اړه اندېښنه ښودلې ده.
د ملګروملتونو د امنيت شورا غړو د روان کال د کب مياشتې په ۲۲مه نېټه، دغه بريدونه چې پکې د دولت، رسنيو، عدلي او قضايي بنسټونو کارکوونکي، روغتیايي کارکوونکي، د ښځو او بشري حقونو فعالين او مذهبي لږکي په نښه کېږي، په کلکو ټکو وغندل.
د نوموړې شورا په اعلاميه کې راغلي، د ملګروملتونو د امنیت شورا غړي د هدفي وژنو د ژر تر ژره پايته رسېدو غوښتونکي شول او د دغو بريدونو د عاملینو په چټکې محاکمې يې ټينګار وکړ.
د ملګروملتونو امنيت شورا ټینګار کړی چې، ټول اړخونه بايد په هر ډول شرایطو کې د ملکي وګړو د ملاتړ او نړيوالو بشردوستانه قوانينو ته د درناوي په ګډون پر خپلو ژمنو عمل وکړي.
د ملګروملتونو امنيت شورا غړو ويلي دي چې، هدفي بريدونه جنګي جنايت دی او سولې ته رسېدل يوازې د افغانانو په مشرۍ او مالکيت د خبرواترو له لارې امکان لري.
د ملګروملتونو د امنيت شورا غړو همداراز د سولې په بهیر کې د ښځو په بشپړ او معنی لرونکي ګډون باندې هم ټينګار کړی دی.
د ملګروملتونو امنيت شورا د مذاکراتو اړخونه د سولې په بهیر کې باور جوړونې، د تاوتريخوالي کموالي او ښه نيت ته هڅولي دي.
د دې اعلاميې په وروستۍ برخه کې د ملګروملتونو امنيت شورا، افغانستان او سيمې ته د ترهګرۍ ګواښ په اړه هم خپله اندېښنه ښودلې ده.
کابل ښار په وروستيو میاشتو کې د تاوتريخوالي او هدفي وژنو له زیاتوالي سره مخ دی چې په ډېری موردونو کې هېڅ شخص يا ډلې د دغو پېښو مسؤلیت پر غاړه نه دی اخيستی. په ځينو ولايتونو کې هم ورته پېښې ډېرې شوې دي. دولت د دغو هدفي بريدونو مسؤليت پر طالبانو اچوي.