۸صبح، کابل: د کډوالو په چارو کې د ملګرو ملتونو عالي کمېشنرۍ (UNHCR) اعلان کړی چې د ډنمارک د بېړنیو زېرمو په ملاتړ یې د وروستۍ زلزلې پر اغېزمنو بېړنۍ بشردوستانه مرستې وېشلې دي.
د ملګرو ملتونو دغه سازمان سهشنبه د تلې پر ۱۵مه په خپله اېکس پاڼه کې لیکلي چې د ډنمارک په ملاتړ پر زلزله ځپلو څه باندې درې زره کمپلې، پنځه زره لویې خیمې، پنځه زره پلاستیکي خیمې او د اوبو زر ډبي وېشل شوې دي.
نوموړي بنسټ زیاته کړې چې مرستندویه ډلې یې په سیمه کې دي څو ډاډه شي چې مرستې پر اړمنو وېشل شوې دي.
د ملګرو ملتونو دغه سازمان ټينګار کړی چې په افغانستان کې د زلزله ځپلو د بېړنیو اړتیاوو پوره کولو او د ژوند بیارغولو لپاره د نړیوالې ټولنې دوامداره ملاتړ اړین دی.
د یادونې ده چې د افغانستان په ختیځ کې د وروستۍ زلزلې په پایله کې څه باندې ۲۲۰۰ کسان مړه، له ۳۶۰۰ ډېر ټپيان او پنځه زره کورونه ویجاړ شوي دي.
