۸صبح، کابل: د ملګرو ملتونو د بشري استوګنې پروګرام (UN-Habitat) خبر ورکړی چې د کابل په پغمان ولسوالۍ کې یې د جاپان د نړیوالو همکاریو (جایکا) بنسټ په همکارۍ د سړکونو د بیارغونې پروژه پلې کړې ده.
نوموړي سازمان پنجشنبه د چنګاښ پر ۱۸مه په اېکس پاڼه کې لیکلي چې د پغمان ګڼ اوسېدونکي د خامو سړکونو له کبله د تګ راتګ په برخه کې له ګڼو ننګونو سره مخ دي.
ملګرو ملتونو زیاته کړې چې د کابل په پغمان ولسوالۍ کې د سړکونو په ښه کېدو سره بنسټيزو خدماتو ته د خلکو لاسرسی خوندي شوی او د سیمې اوسېدونکو د ژوند له شرایطو سره مرسته کوي.
د دغه بنسټ په خبره، د دې پروژې موخه د تګ راتګ خوندي کول، بنسټيزو خدماتو ته د خلکو په لاسرسي کې اسانتیا راوستل او د ځايي اوسېدونکو له معیشت څخه ملاتړ دی.
د ملګرو ملتونو د بشري استوګنې پروګرام ټينګار کړی چې خوندي لارې، فرصتونو ته لاسرسی ډېروي.
