امريکا اوو افغان مېرمنو ته د زړورو ښځو افتخاري جايزې ډالۍ کړې

د امريکا د بهرنيو چارو وزارت اعلان کړی هغو ۷ مېرمنو ته یې په افتخاري توګه د زړَورو ښځو نړيواله جايزه ورکړې چې په ۲۰۲۰ کال کې په افغانستان کې ترور شوې دي.
د زړورو ښځو نړیواله جايزه هر کال د امريکا د بهرنيو چارو وزارت لخوا هغو مېرمنو ته ورکول کېږي چې د ښځو وضعيت د ښه والي لپاره هڅه کوي او په دې برخه کې زړورتيا ښيي.
د امريکا د بهرنیو چارو وزارت د اعلاميې په اساس، د نورو ګټونکو ترڅنګ د زړورو ښځو نړیواله جايزه د بشري حقونو کارکوونکې فاطمې خليل، د ملي امنيت د جندر رئيسې فروغ شرميلا، د بې پولې ډاکترانو روغتون قابلې مريم نورزاد، د پوليسو افسرې فاطمې رجبي، د کندهار زندان ساتونکې فرشتې، د انعکاس ټلويزیون خبريالې ملالې ميوند او د کاپيسا ولايت مدني فعالې فرشتې کوهستانۍ ته چې د ۲۰۲۰ کال په اوږدو کې په بېلابېلو پېښو کې ترور شوې دي، ډالۍ شوې.
د بشري حقونو خپلواک کمېسيون کارکوونکې فاطمه خليل په چنګاښ میاشت کې د کابل په دوولسمه ناحيه کې د یوې چاودنې له امله ووژل شوه.
همدارنګه د ملي امنيت د جندر رئيسه جنرال شرميلا فروغ چې د امريکا بهرنيو چارو وزارت نوموړې د ملي امنيت پخوانۍ کارکوونکې ګڼلې ده، د انسان تښتونې پر ضد يې مبارزه کوله، د وري په ۱۱مه په کابل کې په يوه چاودنه کې ووژل شوه.
د بې پولې ډاکترانو روغتون روغتیاپاله مريم نورزاد د غوايي مياشتې په ۲۳مه په دشت برچي کې د وسله والو په بريد کې ووژل شوه. د امريکا د بهرنيو چارو وزرات ويلي چې مريم حاضره نشوه هغه ناروغان په خپل حال پرېږدي چې د زېږون په حال کې ؤ او له ميندو او نويو زېږېدلو ماشومانو سره ووژل شوه.
فاطمه رجبي چې د زړورو ښځو نړيواله جايزه ورته ډالۍ شوې، د کورنيو چارو وزارت پخوانۍ افسره وه چې له نشه يي توکو سره د مبارزې په برخه کې يې کار کاوه. نوموړې له کابله جاغوري ولسوالۍ ته پر لاره د طالبانو له لوري له تښتول کېدو وروسته ووژل شوه. دغه پېښه د روان کال په چنګاښ مياشت کې په غزني کې وشوه.
همدارنګه د زړورو ښځو نړيواله جايزه د کندهار زندان ساتونکې فرشتې ته هم ډالۍ شوه. نوموړې د لړم مياشتې په څلورمه ترور شوه.
په همدې ترتيب د امریکا بهرنيو چارو وزارت د انعکاس ټلويزیون خبريالې ملالې ميوند ته هم دا جایزه ورکړه. نوموړې د روان کال د ليندۍ مياشتې په شلمه د داعش ډلې د وسله والو لخوا په ننګرهار کې ووژل شوه.
همداراز د امريکا د بهرنیو چارو وزارت د زړَورو ښځو نړيواله جايزه د سياسي چارو او د ښځو حقونو فعالې فرشتې کوهستانۍ ته هم ډالۍ شوه چې د سلواغې په څلورمه په کاپيسا کې ووژل شوه.
د امريکا د بهرنيو چارو وزارت، هدفي وژنې چې په کې ښځې وژل کېږي، زړه بوږنوونکې بللي او غندلې يې دي.
دغه جايزې د مارچ مياشتې په اتمه نېټه د امريکا د بهرنيو چارو وزارت لخوا په یو لړ مراسمو کې د دوی کورنیو ته ډالۍ شوې.