د امریکا د بهرنیو چارو وزیر د ملګروملتونو له سرمنشي سره خبرې وکړې

د امریکا بهرنیو چارو وزیر انتوني بلینکن د ملګروملتونو له سرمنشي انتونیو ګوتیرش سره د افغانستان د سولې بهیر په اړه خبرې کړې دي.
په دغو خبرو کې، بلینکن د ملګروملتونو د ملاتړ او ژمنې له امله مننه وکړه چې د افغانستان د سولې په مذاکراتو کې یوې سیاسي هوکړې، دوامداره او هر اړخیز اوربند ته د رسېدو په برخه کې مرسته کوي.
د امريکا د بهرنیو چارو وزارت د دغو خبرو په اړه نور جزیات نه دي ورکړي. دواړو لوریو د برما او ایتوپيا هېوادونو د مسایلو په اړه هم خبرې کړې دي.
په هغه طرحه کې چې د افغان سولې لپاره د امريکا ځانګړي استازي زلمي خلیل‌زاد حکومت، طالبانو او یو شمېر سیاستوالانو ته سپارلې پکې د ملګروملتونو تر څارنې لاندې د يو لړ غونډو د جوړېدو خبره هم شوې ده.
ولسمشر غني او عبدالله عبدالله ته د انتوني بلينکن لیک په يوه برخه کې راغلي چې امريکا دوامداره او هر اړخیز اوربند ته د رسېدو لپاره ښکېلو اړخونو، د سیمې هېوادونو او له ملګروملتونو سره يوځای په لوړه کچه ډیپلوماتیکې هڅې تعقیبوي.
په دغه لیک کې راغلي چې امريکا له ملګروملتونو څخه غواړي چې د روسیې، چین، پاکستان، ایران، هند او امريکا د بهرنیو چارو وزیرانو او استازو په ګډون دې يوه ناسته جوړه کړي چې پکې د افغان سولې د ملاتړ په تړاو پر یوې ګډې کړنلارې بحث وشي. که څه هم حکومتي سرچینو له دې وړاندې ۸صبح ته ویلي ؤ چې تمه ده د زلمي خلیلزاد په وړاندیز د ملګرو ملتونو په مشرۍ د بُن غونډې ته ورته يوه ناسته د مارچ په ۲۷مه نېټه د ترکیې په استانبول کې جوړه شي، خو د ترکیې د بهرنیو چارو وزارت ويلي چې دغه غونډه به په اپرېل میاشت کې جوړه شي.