له ښځو سره د طالبانو دښمني څه نوې خبره نه ده او دا مقوله اوس د ټولو د ژپو پر سر ده، چې طالبان نجونو ته ځکه د زده کړو اجازه نه ورکوي چې د لوستې ښځې زوی طالب کېدای نه شي. طالبانو د ښځو پروړاندې د پرله پسې محدودیتونو په لګولو سره وښوده چې د دوحې د مذاکراتو پرمهال د ښځو د حقونو په تړاو د دې ډلې د مشرانو ژمنې او خبرې یوازې د واک د ترلاسه کولو لپاره سیاسي مانورې وې او په عمل کې طالبان هماغه د نوي یمې لسیزې طالبان دي چې په چادري کې پټو ښځو پسې به قمچنې په لاس ګرځېدل. د طالبانو د کانونو او پټرولیم اوسنۍ وزیر د دوحې د مذاکراتو پرمهال په خپلې یوې وینا کې وویل چې که داځل دوی واکمن شي نو ښځې ان تر دوکتورا زده کړې کولای شي. د طالبانو او امریکا ترمنځ د مذاکراتو غړي او په قطر کې د طالبانو د سیاسي دفتر اوسني مشر سهیل شاهین هم د یوې خبریالې د دې پوښتنې په ځواب کې چې ایا که تاسو بیا واکمن شئ، زه د اوس په څېر د یوې خبريالې په توګه ستا مخې ته درېدلای شم او پوښتنه درنه کولای شم، له مسکا په ډکه خوله وویل چې:« هو! که حجاب وکړې ستونزه نشته.»
خو همدا وړمه ورځ ۸صبح یو راپوری خپور کړ چې طالبانو په کورنیو رسنیو کې د ښځینه خبریالانو پر وړاندې چې د دوی د خوښې حجاب او هرڅه په پام کې ساتي، ورځ تر بلې د فضا د تنګولو په لټه کې دی او رسنیو ته د خبري کنفرانسونو په استول کېدونکو بلنیکونو کې لیکي چې «د ښځو لپاره ځای نشته» څومره چې د طالبانو د واکمنۍ ورځې اوږدېږي، پر ښځو د ژوند کړۍ راتنګېږي او ان په خپلو کورونو کې هم کار کولو ته نه پرېښودل کیږي، طالبان ان هغه ښځې چې په ننګرهار کې یې په خپلو کورونو کې د فابریکو لپاره کار کاوه، له کاره منع کړې. له کوره بهر خو یې هسې هم کورنیو او بهرنیو موسسو ته خبرداری ورکړی چې که ښځې وګوماري، نو فعالیتونه به یې وځنډوي. د طالبانو په اېډیولوژۍ کې د ښځو مقام تر هغې ډېر ټيټ دی چې ګومان یې کیږي، د ښځو پر وړاندې د دې ډلې سپک نظر کله ناکله په غیر شعوري توګه د دې ډلې د چارواکو په څرګندونو کې رابرسېره کیږي.
د طالبانو د امیرالمومنین له لوري د کابل د علماوو شورا ټاکل شوي مشر « خلیفه دین محمد» چې د دې ډلې یو له لویو ملایانو دی، په خپلې یوه وینا کې چې اوس یې هم کلپونه په ټولنیزو رسنیو کې ښکته پورته کیږي، د ښځو د حقونو د خوندیتوب غوښتنې ته په غبرګون کې وایي چې:« د ښځې حق څه دی؟ ډوډۍ ورکوه، جامې ورته کاوه او راڅملوه یې.» په دې وروستیو کې د جنسي مسایلو په تړاو ملا هبت الله ته د دغه نږدې ملا خبرې په خلکو کې ډېرې مشهورې شوې دي، هغه د افغانستان په څېر دودیزه ټولنه کې جنسي مسایل هغه هم د همجسبازانو په تړاو دومره په شد او مد بیانوي چې په افغاني ټولنه کې یې څوک په اورېدو هم خوله خوله کیږي.
څو ورځې وړاندې د کابل د شاوعروس بند د پرانېستې مراسمو ته د طالبانو یو شمېر چارواکو ویناوې وکړې. که څه هم د دې پروژې ډېری چارې د جمهوریت پر مهال ترسره شوې وې، خو د پرانېستل کېدو مراسم یې د طالبانو په برخه شول. دې غونډې ته د طالبانو د نورو چارواکو ترڅنګ د دې ډلې د اوبو او برېښنا وزیر هم وینا وکړه. د برېښنا د وزیر خبرې د شاوعرس بند د تخنیکي مسایلو په تړاو نه وې، ځکه ښکاره ده چې یو ملا به نو د بندونو د جوړېدو په تړاو څه ووایي. هغه د خپلو خبرو په یوه برخه کې په افغانستان کې چې د ده په وینا، په هر کور کې یې وسله شته، د طالبانو له لوري د امنیت ټينګښت یوه لویه لاسته راوړڼه وبلله او په خپلو خبرو کې یې د طالبانو پر وړاندې د تبلیغاتي جګړې خبره وکړه او ویې ویل چې دښمنان د «امارت» بریاوې نه شي زغملای. خو د هغه خبرو دا برخه ډېره د پاموړ وه چې د ښځو د نوم له اخیستو مخکې یې بې ادبي معاف کله وکاروله. نوموړي وویل: کشر، مشر بې ادبي معاف زنانې ټول له وسلې سره بلد دی.»
بې ادبې معاف په ډېرو داسې مواردو کې کارول کیږي، چې یو څوک د یو څه پر ویلو شرمېږي او مخکې له مخکې له مخاطبه د دې خبرې د کولو له امله بښنه غواړي، فرض کړئ، د جنسي مسایلو په تړاو کومې خبرې چې په کابل کې یې د طالبانو د علماوو شورا مشر کوي، که د دې دودیزې ټولنې کوم بل څوک وکړي، نو هرو مرو به د خبرې تر کولو مخکې ووایي چې بې ادبي معاف. د بې ادبي معاف اصطلاح په ځينو مواردو کې حیواناتو لپاره هم کارول کیږي، په ځانګړې توګه په لېرې پرتو سیمو کې چې کله څوک د خره یا مرکب نوم اخلي، نو وایي بې ادبي دې معاف وي.
د ښځو پروړاندې د طالبانو کارول کېدونکو اصلاحاتو ته په پام سره داسې ښکاري چې افغانستان نه یوازې د ترهګرو جنت ګرځيدلی بلکې، د متحجران او بدویانو پر ارمان ښار بدل شوی دی. په دې ارمان ښار کې ښځه له هر ډول حقه بې برخې ده او ان په هغو نومونو یا مختاړو سره یادېږي چې د حیوانانو لپاره کارول کیږي، په دې ارمان ښار کې هر څه مخ پرڅټ روان دی. په دغه ارمان ښار کې باید ټول له مدرسو فارغان وي او د جګړې او ځانمرګو بریدونو لپاره یې ملا تړلې وي. د دې ارمان ښار ښځې باید د اولاد په زېږولو کې له یو بل سره سیالی ولري او د یوه سړي د دویمې، درېمې او څلورمې ښځه په توګه ژوند وکړي.
