ملګرو ملتونو په یوه پیغام کې ویلي چې هره ښځه او نجلۍ حق لري چې په هر ځای کې د خوندیتوب احساس وکړي.
دغه سازمان یکشنبه د اکټوبر پر ۱۹مه زیاته کړې چې دولتونه باید د جنسیت پر بنسټ د تاوتریخوالي پر مخنیوي پانګونه وکړي.
د ملګرو ملتونو په وینا، دولتونه باید قوانین په سمه توګه پلي کړي او د معافیت کلتور پای ته ورسوي.
ملګرو ملتونو دا څرګندونې په داسې حال کې کړې چې په افغانستان کې ښځې او نجونې له سختې ځپنې سره مخ دي.
د طالبانو له واکمنېدو وروسته، افغان ښځې او نجونې له بنسټيزو حقونو لکه د زده کړو، تحصیل، کار، انفرادي ازادیو او تګراتګ له حقه محرومې شوې دي.
د ملګرو ملتونو د امنیت شورا د راپور له مخې، په افغانستان کې ښځې د طالبانو د امر بالمعروف او نهي عن المنکر وزارت له خوا تعقیب او ځپل کېږي.
