د ولسي جرګې د مالي چارو کمېسیون د اجـمـل احمدي لاسلیک بې اعتباره اعلان کړ

د ولسي جرګې د بودیجې، مالي او بانګونو چارو کمېسیون د وري په ۳۱مه نېټه په پارلماني چارو کې د دولت وزارت ته په یوه لیک کې د افغانستان بانګ د عمومي ریاست د سرپرست اجمل احمدي لاسلیک بې اعتباره اعلان کړی دی.
په دغه لیک کې چې د ولسي جرګې د مالي چارو د کمېسیون رییس میرافغان صافي لاسلیک کړی، ویل شوي چې د اجمل احمدي د سرپرستۍ دوام ناقانونه دی او په د افغانستان بانګ کې د افغانستان د سرچینو د حیف و میل کېدو او قانوني مراجعو ته د احمدي د نه ځواب ویلو په اړه رپوټونه ورکړل شوي چې د اندېښنې وړ دي.
د ولسي جرګې د مالي چارو او بودیجې کمېسیون له ولسمشر څخه غوښتي چې په شرایطو برابر بل کس د افغانستان بانګ د ریاست لپاره ولسي جرګې ته معرفي کړي.
دغه کمېسیون په پارلماني چارو کې د دولت له وزارته غوښتي چې ددې لیک څو کاپۍ مالیې او بهرنیو چارو وزارتونو، نړیوال بانګ، د پیسو نړیوال صندوق، سفارتونو او بودیجه یي بنسټونو ته ولېږي چې د نوي سرپرست تر ټاکلو پورې د ننه په هېواد او بهر کې د بانګي راکړې ورکړې مخنیوی وشي.
د ولسي جرګې د مالي چارو کمېسیون وايي چې د اجمل احمدي لاسلیک عتبار نه لري او څوک چې د هغه د لاسلیک پربنسټ اجراات وکړي مسوولیت به یې پرخپله غاړه وي.
ولسي جرګې له دې مخکې هم د اجمل احمدي لاسلیک هغه وخت چې د صنعت او سوداګرۍ وزارت سرپرست و بې اعتباره اعلان کړی و.
ولسي جرګې په خپلې یوه عمومي غونډه کې، د کابل ښاروال داوود سلطان زوی لاسلیک هم بې اعتباره اعلان کړی دی.