هند کې د کرونا درېیمه څپه؛ دغه ویروس د IPL لوبې بې خونده کړي

په داسې حال کې چې په هند کې د کرونا درېيمه څپه په خورا چټکۍ سره په خپرېدو ده او په ورځيني توګه دغه هېواد کې زرګونه کسان په کرونا اخته کېږي، دغه روان وضعيت د دې هېواد لويې سوداګريزې سيالۍ IPL باندې هم خپل سيوری غوړولی دی.
په هند کې د کرونا مثبتو پېښو په زياتېدو سره تازه په تازه د IPL سياليو ځينو لوبغاړو دغه سيالۍ پرېښي او د خپلو کورونو په لور خوځېدلي دي. د دغو لوبغاړو له ډلې دوو اسټرالياوي لوبغاړو اډم زمپا او کین ریچارډسن د کرونا ویروس له وېرې يادې سیالۍ پرېښي او اسټرالیا ته ستانه شوي دي.
له بلې خوا د همدغو دوو لوبغاړو لوبډلهRoyal Challenger Bangalore بيا رسما اعلان کړی چې دغه لوبغاړو د شخصي ستونزو له امله یادې سيالۍ پرېښی او لوبډله د دوی پرېکړې ته درناوی لري.
خو د معلوماتو له مخې دغو لوبغاړو په هند کې د کرونا د چټکې خپرېدو له امله سيالۍ پريښي دي.
له دې سره هم‌مهاله بيا ځيني لوبغاړو په هند کې د کرونا ويروس له امله د رامنځته شوي ناورين سره د مبارزې په موخه د هند حکومت سره مرستې ته رادانګلي دي.
د اسټراليا د کرکټ لوبډلې غړي او د هند کرکټ غوره ليګ IPL کې د کلکتې نايټ رايډرز لپاره لوبېدونکي لوبغاړي پاټ کومينز په هند کې د کرونا ويروس سره د مبارزې په موخه د ۵۰ زره امريکايي ډالرو مرستې اعلان وکړ.
نوموړي په خپل ټوېټر ليکلي دي چې، د لوبغاړو په توګه موږ ته پکار ده چې د ميليونونو وګړو ستونزو ته ورسېږو او د خوندي ساتلو لپاره يې هڅې وکړو او د همدې موخې لپاره ما د مرستې رسونې له صندوق سره مرسته وکړه.
په ورته وخت کې د کرکټ چارو شنونکي او د دغې لوبې مينه والو سره اندېښنه ده چې دغه سيالۍ به په هند کې د کرونايي وضعيت له امله دوام ومومي او کنه.
خو د معلوماتو له مخې د دغه ستر سوداګريز ليګ مسؤلين وايي چې دوی روغتيايي لارښوونې په جدي توګه مراعتوي او د دغو سياليو دوام ته ژمن دي.