په ننګرهار کې د انعکاس ټلویزیون درې ښځېنه کارکونکې ووژل شوې

د کب په دوولسمه نېټه په جلال آباد ښار کې په دوو جلا بريدونو کې د انعکاس ټلویزیون درې ښځينه کارکوونکې ووژل شوې.
شهناز او صدیه د جلال آباد ښار د لومړی ناحیې اړوند بنګړیوالانو کوڅې سره په ډزو ووژل شوې او مرسل بیا د څلورمې ناحیې اړوند قصبې سیمه کې خپل کور ته نږدې وژل شوې ده.
د ننګرهار د حوزوي روغتون مسؤلين وايي چې روغتون ته دوه جسدونه او درې ټپي مېرمنې وروړل شوې چې يوې ټپي مېرمنې بيا په روغتون کې ساه ورکړه.
یوې امنیتي سرچینې ۸صبح ته وویل چې، ددغې پېښې په تړاو یې د قاري بصیر په نوم یو تن نیولی چې اوس مهال ترې پلټنې روانې دي.
د ننګرهار امنیه قومنداني هم د قاري بصیر نیول تائيدوي. دوی وایي، قاري بصیر د دغو بریدونو مشري کوله او نوموړی له طالبانو سره اړيکې لري. خو طالبانو په دغو پېښو کې لاس لرل رد کړي دي.
د دغې ډلې ویاند ذبیح الله مجاهد په خپل ټوېټر لیکلي چې په جلال آباد کې شوي بریدونه په دوی پورې اړه نه لري.
له پېښې یوه ورځ وروسته رویټرز خبري آژانس رپوټ ورکړ چې داعش ډلې ددغه برید مسوولیت منلی دی.
ولسمشرۍ دفتر، د ملي روغې جوړې عالي شورا، په کابل کې د بهرنیو هېوادونو استازولیو، د ملګروملتونو سازمان دفتر او له رسنیو د ملاتړ بنسټونو دا بریدونه غندلي دي.
نږدې درې میاشتې وړاندې د همدغه ټلویزیون ویانده ملاله میوند هم له خپل موټر چلونکي سره په ورته برید کې ووژل شوه. د برید مسوولیت هم داعش ډلې منلی ؤ.
دغو بریدونو د خلکو غبرګونونه هم راپارولي دي. دوی وایي، د ملالې له وژلو ورورسته د ننګرهار والي ضیاالحق امرخېل ویلي ؤ چې د ملالې قاتلین یې نیولي او بریدګرو په خپل جرم اعتراف هم کړی دی، خو تر دې دمه د نیول شویو کسانو برخلیک معلوم نشو.