درې خبریالان په افغانستان کې د کال د خبریالانو په توګه غوره شول

د افغانستان د خبریالانو مرکز د خبریال د ورځې په مناسبت، د ۸صبح ورځپاڼې د سولې برخې د مسوولې په ګډون درې تنه د کال د خبریالانو په توګه وټاکل.
دغه مرکز د کب په ۲۷مه نېټه د افغانستان د کال د خبریالانو د سیالۍ پروګرام پایلې اعلان کړې. ددغه مرکز د اعلان پر بنسټ، د ۸صبح د سولې برخې مسووله آسیه حمزه اي، د پیک خبري آژانس خبریاله فخریه رادفر او د اطلاعات روز ورځپاڼې خبریال لیاقت لایق په افغانستان کې د کال د خبریالانو په توګه غوره شوي دي.
آسیه حمزه اي د ۸صبح ورځپاڼې د سولې برخې مسووله ده چې د سولې بحثونو او هوکړه لیکونو پر ارزونې سربېره، د جګړې د قربانیانو او ښځو د حقونو په برخو کې هم پراخ فعالیت لري.
ددغو درېیو خبریالانو ترڅنګ لس نور خبریالان هم د افغانستان د خبریالانو مرکز له خوا د کال د غوره خبریالانو په توګه ټاکل شوي دي.
د ۸صبح ورځپاڼې تحقیقي خبریال مجتبی بیګ زاده هم د روان کال د غوره خبریالانو په ډله کې راغلی دی.
بیګ زاده د تحقیقي رپوټونو له هغې ډلې د کورونا او وچې ډوډۍ د پیسو د حیف ومیل په اړه راپورونو په خپرولو، د رڼو څېړنو او څارنوالۍ ته د عاملینو د معرفي کولو زمینه برابره کړې ده.
د افغانستان د خبریالانو مرکز یو خپلواک او غیرسیاسي بنسټ دی چې په ۱۳۸۸ کال کې جوړ شوی دی.
دا بنسټ وخت ناوخت د خبریالانو د ظرفیت د لوړولو او د دوی د خوندیتوب لپاره علمی او تخصصي پروګرامونه، د خبریالانو د حقونو لپاره د عدالت غوښتنې او د هېواد د غوره خبریالانو او مخکښو رسنیو د ستاینې په موخه پروګرامونه جوړوي.