د افغانستان په اړه درې پرېکړه لیکونه صادر شول

دغه پرېکړه لیکونه د اسلامي همکاریو سازمان، د وزیرانو شورا د ۴۷مې ناستې په بهیر کې، صادر شوي دي. د بهرنیو چارو وزارت د اعلان له مخې، دا پرېکړه لیکونه د افغانستان د وضعیت، د داعش د جنایتونو او له افغانستانه په ملاتړ کې، د سیمه ییزو نوښتونو په اړه دي. افغان دولت، د اسلامي همکاريو سازمان د پرېکړه لیکونو له صادرولو هرکلی کړی او هغه یې له افغانستانه د اسلامي نړۍ د ملاتړ بېلګه بللي دي. د اسلامي همکاریو سازمان د بهرنیو چارو وزیرانو شورا ناسته، د لیندۍ په اوومه او اتمه نېټه د نایجیر هېواد په نیامي ښار کې وشوه. د بهرنیو چارو وزیر حنیف اتمر د افغانستان په استازیتوب په دغه غونډه کې ګډون کړی و. د بهرنیو چارو وزارت د اعلان له مخې، د اسلامي همکاریو سازمان، ددغه سازمان په غړو هېوادونو کې له دیني عالمانو او مذهبي بنسټونو غوښتي چې په افغانستان کې د جګړې مخالفت او د سولې په ملاتړ کې دریځ خپل کړي. د بهرنیو چارو وزارت ویلي چې د سولې له مذاکراتو د غړو هېوادونو په څرګند ملاتړ سره، په دغو پریکړه لیکونو کې په کلکه د سولې خبرو هرکلی شوی او د افغان دولت په تېره بیا د طالب بندیانو په خوشي کولو کې د کړنو هرکلی شوی دی.
د اسلامي همکاریو سازمان، په دغو پرېکړه لیکونو کې په هېواد کې وروستي بریدونه غندلي دي. دغه سازمان په بامیان، کابل پوهنتون، کوثر ښوونیز مرکز او په برچي سیمه کې پر یوه روغتون بریدونه په کله غندلي دي. د اسلامي همکاریو سازمان له طالبانو غوښتي چې تاوتریخوالی کم کړي او د اوربند له ټینګښت سره هوکړه وکړي.
د اسلامي همکاریو سازمان په پرېکړه لیک کې له غړو هېوادونو غوښتل شوي چې په افغانستان کې له ټول ګډونه سولې ملاتړ وکړي چې سیاسي حل لارې ته ورسېږي.
د بهرنیو چارو وزارت وایي چې د اسلامي همکاریو سازمان له بېلابېلو بنسټیزو پروژو، چې موخه یې د افغانستان او ګاونډیو هېوادونو ترمنځ د همکارۍ پياوړتیا ده، خپل ملاتړ اعلان کړی دی. په دغو پروژو کې د اورګاډي پټلۍ، تاپي او د سیمه ییزې برېښنا د لېږد کاسا زر پروژې شاملې دي.
په دغو پرېکړه لیکونو کې د سولې، امنیت، سیاست، اقتصاد، کډوالو او سیمه ییزو همکاریو په شان مسایل ځای لري.