۸صبح، کابل: په کاپیسا ولایت کې د اوبو رسونې درې شبکې فعالې شوې، چې نږدې ۹۰۰ کورنیو ته یې د څښاک پاکو اوبو ته لاسرسی برابر کړی دی.
د طالبانو تر کنټرول لاندې باختر خبري اژانس پنجنشنبه د وری په ۷مه راپور ورکړی چې دا شبکې د کاپیسا په تګاب او نجراب ولسوالیو کې جوړې شوې دي.
د راپور له مخې، د اوبو رسونې دغه شبکې د ۱۹ میلیونه افغانیو په لګښت بشپړې شوې دي.
په راپور کې دا نه ده څرګنده شوې چې دغه شبکې د کوم بنسټ په مالي لګښت جوړې شوې دي.
په افغانستان کې د څښاک د پاکو اوبو نشتوالی یوه جدي ننګونه ده.
تر دې وړاندې په افغانستان کې د سره صلیب کمیټې خبرداری ورکړی و چې په افغانستان کې ۳۳ میلیونه خلک د څښاک پاکو اوبو ته لاسرسی نه لري.
په کلیو او ښارونو کې هېوادوال له دې ستونزې سره مخ دي.
