۸صبح، لغمان: طالبانو خبر ورکړی چې په لغمان کې د دوو ترافیکي پېښو په پایله کې د یوې ښځې په ګډون دوه تنه مړه او نهه نور ټپيان شوي دي.
په لغمان کې د طالبانو د امنیې قوماندانۍ رسنیز دفتر پنجشنبه د وږي پر ۱۲مه خبر ورکړی چې دا پېښې د لغمان په بېلابېلو سیمو کې شوې دي.
لومړنۍ پېښه د کابل – جلالاباد پر لویې لارې د سهار شاوخوا لس نیمې بجې شوې چې پکې د یوې ښځې په ګډون دوه کسان مړه او څلور نور ټپيان شوي دي.
دویمه پېښه بیا شاوخوا دولس نیمې بجې شوې چې د دوو موټرو په ټکر کې پنځه کسان ټپيان شوي دي.
د خبرپاڼې له مخې، د پېښو ټپيان روغتیايي مرکزونو ته لېږدول شوي او روغتیايي وضعیت یې د ډاډ وړ دی.
نوموړې قوماندانۍ له چلوونکو غوښتي چې ترافیکي قوانینو ته پام، له چټک تګه ډډه او احتیاط وکړي.
