۸صبح، نیمروز: په فراه، نیمروز، بادغیس، میدانوردګ او ننګرهار کې ځايي سرچینې وايي چې په دغو ولایتونو کې د جلا ترافیکي پېښو په پاېله کې پنځه کسان مړه شوي دي.
سرچینو ۸صبح ورځپاڼې ته ویلي چې سهشنبه د لیندۍ پر ۱۳مه د بادغیس بالامرغاب ولسوالۍ په «بزبای» کلي کې «بلډوزر» ګاډي یو موټرسایکل لاندې کړی چې له کبله یې یو نارینه مړ او یوه ښځه او یو ماشوم ټپي شوی دی.
دغه راز، په فراه کې سرچینې وايي چې د دغه ولایت د شیبکوه ولسوالۍ اړوند سیمه کې یوې سراچې له مازدا ډوله موټر سره ټکړ کړی چې په پاېله کې یې یو کس مړ شو او څلور نور ټپيان دي.
ورته مهال، د زرنج – دلارام پر لویې لارې د یوه موټر چپه کېدو په پېښه کې هم یو کس مړ شوی دی.
اخوا په میدانوردګو کې هم سرچینو ویلي چې د دغه ولایت سیداباد ولسوالۍ پورې اړوند سیمه کې یوه کرولا له باروړنکي موټر سره جنګېدلی چې پکې یو کس مړ دی او پنځه نور ټپيان دي.
همدارنګه د ننګرهار مرکز جلالاباد په اتمې ناحیې کې هم د یوې ترافیکي پېښې په پاېله کې یو ماشوم مړ شوی دی.
د ډېرو ترافیکي پېښو لامل د موټروانانو بېاحتیاطي او ترافیکي قوانینو ته نه پاملرنه ښودل شوی دی.
