۸صبح، هلمند: سیمهییزې سرچینې وايي چې په هلمند کې د طالبانو د غړو ځانګړي ښوونیز مرکزونه، د عامو وګړو لپاره د دولتي ښوونیزو مرکزونو پرتله غوره اسانتیاوې لري.
سرچینو دوشنبه د تلې پر ۲۰مه ۸صبح ورځپاڼې ته وویل چې د طالبانو د غړو ځانګړي ښوونیز مرکزونه پر غوره درسي توکو، پرمختللو تجهیزاتو او لیلیو سمبال دي خو عادي محصلان له دغو اسانتیاوو بې برخې دي.
په هلمند کې محصلان وايي چې هغوی د درسي توکو او ښوونیزو امکاناتو له کمښت سره مخ دي او ستونزې یې ورځ تر بلې زیاتېږي.
ویل کېږي له دې مخکې د «بدل اعاشې» په نوم پیسې چې په هلمند کې د دولتي انسټيټوټونو محصلانو ته ورکول کېدې، بندې شوې دي.
ځينې محصلان وايي چې په وار وار یې په هلمند کې خپلې ستونزې له طالب مسوولانو سره شریکې کړې، خو تر اوسه یې غوښتنو ته پام نه دی شوی.
دا په داسې حال کې ده چې د سرچینو په خبره، د هېواد د ځينو نورو ولایتونو په دولتي ادارو کې هم د طالبانو او عادي اوسېدونکو ترمنځ توپیري چلند کېږي.
