د امریکا ولسمشر ډونالډ ټرمپ ویلي چې د ۲۰۲۶ کال د سولې د نوبل جایزې وړ دی، خو د ګټلو په اړه یې ډاډه نه دی.
رویټرز پنجشنبه د اکتوبر پر ۸مه راپور ورکړی چې ټرمپ په سپینه ماڼۍ کې ویلي نه پوهېږي د نوبل کمېټه به څه پرېکړه وکړي او په وینا یې، «ښايي دا جایزه زما په څېر کسانو ته ورنه کړي.»
ټرمپ له بیاواکمنېدو راوروسته په وار وار ویلي چې د څو جګړو د پای ته رسولو د هڅو له کبله دې د نوبل د سولې جایزه ورکړل شي.
ټرمپ ویلي چې د ولسمشرۍ د دویمې دورې له پیل راهیسې یې د اتو جګړو د پای ته رسولو لپاره هڅې کړې، خو بیا هم په ځينو سیمو کې جګړې بېرته پیل شوې دي.
د روسیې او اوکرایین جګړه روانه ده او ټرمپ ژمنه کړې وه چې دا جګړه به د ولسمشرۍ د دویمې دورې د پیل پر لومړۍ ورځ پای ته رسوي.
ورته مهال له ایران سره د امریکا او اسراییل جګړه هم د امریکا د بهرنۍ تګلارې پر مهم بحران اوښتې ده.
