۸صبح، کابل: په افغانستان کې د ملګرو ملتونو مرستندویه پلاوی (یوناما) وايي چې د ۲۰۲۶ کال د جولای او سپتمبر ترمنځ په هرات او کابل کې لږ تر لږه ۵۲ ښځې او یوه نجلۍ توقیف شوې ده.
یوناما پنجشنبه د تلې پر ۱۶مه په خپرې کړې اعلامیې کې ویلي چې واکمنو چارواکو ځينې نورې ښځې هم په نیولو ګواښلې دي.
د اعلامیې له مخې، دا ښځې د برحاله چارواکو له خوا پر جامو د لګول شویو مقرارتو څخه د سرغړونې په تور نیول یا توقیف شوې دي.
دا ښځې د چادرۍ نه اغوستلو، د وېښتانو ښکاره کیدو، د رنګین ټیکري د پرسولو، سینګار کارولو، یا هم له محرم پرته په عامو ځایونو کې د حضور له امله نیول شوې دي.
یوناما زیاته کړې چې یادې ښځې په توقیف کې د څو ساعتونو له تیرولو وروسته خوشې شوې دي.
نوموړی بنسټ وايي چې ښايي د خوندیتوب او ټولنیزې بدنامۍ د اندېښنو له امله د پیښو د نه راپور کیدو له کبله د پیښو شمیر پام وړ لوړ وي.
یوناما د ښځو، په ځانګړې توګه د ښځینه هټۍ والو پر وړاندې د لفظي سپکاوي، وهلو ټکولو او ګواښونو له امله هم اندېښنه څرګنده کړې ده.
یاد بنسټ ټینګار کړی چې دا کړنې د ښځو او نجونو د تګ راتګ، بیان او خپلواکۍ حقونه تر پښو لاندې کوي او هغوی له ټولنیزې بدنامۍ او لا زیاتې څنډې ته کیدو سره هم مخ کوي.
یوناما له طالبانو غوښتي چې د ښځو او نجونو پر وړاندې د تبعیضي چلندونو مخه ونیسي، د ټولو افغانانو بشري حقونو او انساني کرامت ته درناوی تضمین کړي او د بشري حقونو د نړیوال قانون له مخې د افغانستان مکلیفتونه مراعات کړي.
