د امریکا ولسمشر ډونالډ ټرمپ د ایران د اووه ورځني اوربند وړاندیز رد کړی او ویلي یې دي چې د نومبر له منځنیو ټاکنو وروسته ښايي پر ایران د امریکا بریدونه بېرته پیل شي.
د «وال سټریټ ژورنال» د راپور له مخې، ټرمپ خپلو سلاکارانو ته ویلي چې د بریدونو د بېرته پیلېدو احتمال شته.
وال سټریټ ژورنال شنبه د سپټمبر پر ۲۶مه، راپور ورکړی چې ټرمپ خپلو مرستیالانو ته ویلي، ښايي د نومبر له منځنیو ټاکنو وروسته پر ایران د امریکا بریدونه بېرته پیل شي.
د راپور له مخې، امریکايي چارواکو ویلي چې ټرمپ په دې اړه شک لري چې ایا ایران به د هغه غوښتنې ومني او له همدې امله یې د بریدونو د بیا پیلولو د احتمال په اړه خبرې کړې دي.
له دې سره سره، دغې ورځپاڼې زیاته کړې چې ټرمپ تر اوسه د احتمالي بریدونو د کچې په اړه پرېکړه نه ده کړې او نه غواړي چې پراخ جنګي عملیات بېرته پیل کړي؛ هغه موضوع چې یوه برخه یې د امریکا د مهماتو د زېرمو له کمښت سره تړلې ګڼل شوې ده.
د ایران د بهرنیو چارو وزیر عباس عراقچي تر دې وړاندې ویلي وو چې تهران د قطر له لارې امریکا ته په هرمز تنګي کې د بېړیو د تګ راتګ د بېرته پیلولو لپاره اووه ورځنۍ طرحه سپارلې ده.
ټرېمپ هم د روانې میاشتې په پیل کې ویلي وو چې احتمال لري له ایران سره جګړه سمدستي د منځمهالو ټاکنو تر پای ته رسېدو وروسته او ان تر هغو وړاندې پای ته ورسېږي.
