د کندوز ګلتپې ولسوالۍ اوسېدونکي په اوونۍ کې یو ځل بازار لري چې خپل اړتیا وړ توکي پکې پېري. د دغې ولسوالۍ ټول اوسېدونکي هره اوونۍ «سېشنبې بازار» ته په تمه وي. د هغوی په خبره، په دې ولسوالۍ کې یوازې یو پخوانی او دودیز بازار چې «سهشنبه بازار» نومېږي، شته او په خبره یې، دا بازار څه باندې ۵۰ کاله مخینه لري. د دغې ولسوالۍ اوسېدونکي له سوداګرو او ځايي طالب چارواکو غواړي چې د ولسوالۍ اوسېدونکو د ستونزو هواري لپاره یو معیاري بازار جوړ کړي چې دایمي هټۍ ولري او هر مهال د لاسرسي وړ وي.
ګلتپه کندوز ښار ته نږدې پرته ولسوالۍ ده. دا ولسوالۍ یوازې یو دودیز او پخوانی بازار لري چې ویل کېږي څه باندې ۵۰ کاله مخینه لري او په اوونۍ کې یو ځل په پرانیستي چاپيریال کې خلاصېږي.
د ګلتپې ولسوالۍ ځینې اوسېدونکي په دې ولسوالۍ کې د معیاري او دایمي بازار له نشتوالي شکایت لري. هغوی له سوداګرو غوښتنه وکړه چې په ولسوالۍ کې معیاري پلورنځي جوړ کړي. د هغوی په خبره، له تېرو اوو کالو راهیسې چې دا ولسوالۍ جوړه شوې، هېڅ پرمختیايي او پراختیايي پروګرام پکې پلی شوی نه دی.
د دې ولسوالۍ ځينې اوسېدونکي وايي چې «سهشنبه بازار» ته خلک د ګلتپې له ټولو کلیو او څنګلورو ولسوالۍ خپل توکي راوړي او په دې بازار کې د خلکو ټول اړتیا وړ توکي پېدا کېږي.
د کندوز د ګلتپې ولسوالۍ اوسېدونکی خیرمحمد چې هره سهشنبه د توکو پېرلو لپاره ورځي، وايي چې په دغه بازار کې د خلکو اړتیا وړ ټول توکي شته او خلک اړ دي چې خپلې اوونیزې اړتیاوې په یوې ورځې کې پوره کړي؛ ځکه په خبره یې، نورې ورځې بازار نه شته. نوموړی زیاتوي: «په دې بازار کې له خوراکي توکو نیولې بیا نور هر څه شته. په بازار کې نقاش [د څارویو بازار] شته، اوړه، غوړي، وریژې او هر څه چې وغواړې پېدا کېږي. کله چې باران وي، د خلکو ټول توکي خرابېږي. په بازار کې خټې وي او راټولې شوې اوبه اورو نه لري.»
د ګلتپې ولسوالۍ یو بل اوسېدونکی احمدخان وايي چې په بازار کې څه باندې ۳۵۰ لنډمهالې هټۍ شته. د نوموړي په خبره، بازار ته نږدې سیند دی او کله کله په سیند کې اوبه ډېرېږي او بازار ګواښي.
د ګلتپې ولسوالۍ دا اوسېدونکی زیاتوي: «بازار ډېر نامنظمه دی او یوازې د سېشنبې پر ورځ خلاص وي. موږ غواړو چې د خلکو لپاره معیاري او دایمي بازار جوړ شي چې اسانتیاوې پکې وي.»
د نوموړې ولسوالۍ یو قومي مشر امیرمحمد وايي: «ګلتپه یوه ګڼ مېشته ولسوالۍ ده، خو هېڅ ابادي پکې شوې نه ده. غواړو چې د خلکو لپاره یو معیاري بازار جوړ شي. د بازار جوړېدو لپاره ډېرې ځمکې شته او دلته یوه ولسوالۍ ده؛ باید د نورو ولسوالیو په څېر پام ورته وشي.»
اخوا، په دې ولسوالۍ کې ځايي طالب چارواکي وايي چې «سهشنبه بازار» د خلکو پر ملکیتونو جوړېږي. هغوی وايي چې د دغې ولسوالۍ شاوخوا دولتي ځمکې دي او که پانګوال وغواړي معیاري بازار جوړ کړي، کولای شي دولتي ځمکې وپېري او خلکو ته د اسانتیاوو برابرولو لپاره پانګونه وکړي.
د یادونې ده چې په ګلتپې ولسوالۍ کې «سهشنبه بازار» د کندوز یو نامي بازار ګڼل کېږي چې نه یوازې د دغې ولسوالۍ اوسېدونکي بلکې د نورو ولسوالیو او ان د کندوز د مرکز او څنګلورو ولایتونو اوسېدونکي هم د توکو پېرلو لپاره ورځي.
ګلتپه ولسوالۍ اووه کاله وړاندې جوړه شوه. ویل کېږي چې هغه مهال د ولسوالۍ له ودانۍ او شاوخوا سیمو پرته یې نورې سیمې د طالبانو تر کنټرول لاندې وې. د دې ولسوالۍ اوسېدونکي د جګړو او امنیت نشتوالي لامله د برېښنا، صحي اوبو، منظمو سړکونو او له نورو اسانتیاو بې برخې دي.
د دې ولسوالۍ اوسېدونکي له طالبانو غواړي چې زیربناوې جوړې او خلکو ته چوپړتیاوې برابرې کړي. د هغوی په خبره، طالبانو د مخکېني حکومت پر مهال له خلکو او د هغوی له کورونه د دفاعي ډال په توګه کار اخیسته او په دې ولسوالۍ کې ځينو خلکو سرپناه، اوبه او ډوډۍ ورکوله؛ خو په خبره یې، اوس له پامه لوېدلي دي.
