ترکیې او ۱۷ نورو هېوادونو د غزې سویل په خانیونس کې پر ناصر روغتون د اسراییلو برید غندلی او له دغه هېواده یې غوښتي چې اوربند ته ژمن پاتې شي او اجازه ورکړي چې غزې ته بشردوستانه مرستې له محدودیت پرته ورسېږي.
اناتولي خبري اژانس شنبه د نومبر پر ۱۴مه راپور ورکړی چې د ۱۸ هېوادونو د بهرنیو چارو وزیرانو په یو ګډ بیان کې پر ناصر روغتون د اسراییلو برید چې پکې ناروغانو او روغتیايي کارکوونکو ته مرګ ژوبله اوښتې، له نړیوالو بشردوستانه قوانینو سره په ټکر کې بللی دی.
دا بیان د ترکیې، الجزایر، جیبوتي، مصر، اندونیزیا، اردن، کویټ، لبنان، لیبیا، موریتانیا، عمان، پاکستان، فلسطین، قطر، سعودي عربستان، سومالیا، سوډان او متحده عرب اماراتو له خوا صادر شوی دی.
د دغو هېوادونو د بهرنیو چارو وزیرانو پر ملکي فلسطیني وګړو د اسراییلو بریدونه غندلي او ویلې یې دي چې دا بریدونه اوربند او په غزه کې د امنیت او ثبات ټينګېدو هڅې کمزورې کوي.
هغوی ټينګار کړی چې د دغو بریدونو دوام د امریکا ولسمشر ډونالډ ټرمپ له جامع طرحې سره په ټکر کې دي.
