په دوو اونیــو کې په هېـواد کې د کورونا له امله د ۲۰۸ تنو مړینه

د کورونا د دوهمې څپې له امله د هرې اونۍ په تېرېدو د مړینې شمېر زیاتېږي. په تېرو دوو اونیو کې ددغه ویروس له امله لږترلږه ۲۰۸ تنه مړه شوي دي. دا شمېر د تېرو اونیو په پرتله ۲۵ سلنه زیات شوی دی. دا شمېر په داسې حال کې لوړېږي چې تراوسه د ژمي سر دی او د هوا ککړتیا اټکل شوي حد ته نه ده رسېدلې. د روغتیا وزارت مسوولین له خلکو غواړي روغتیايي سپارښتنو ته پام وکړي او ماسکونه وکاروي، ځکه د کورونا ددوهمې څپې له راتلو سره د هوا ککړتیا هم زیاتېږي. دغه وزارت باوري دی چې که وضعیت له کنټروله بهر شي، ښایي هره طرحه آن بیا ځلې قرنطین عملي شي. د کورونا د قربانیانو شمېر په داسې حال کې زیاتېږي چې ولسمشر غني په خپله د دغه ویروس د دوهمې څپې مدیریت پرغاړه اخیستی دی. مسوولین باور لري چې د حکومت له لومړي چارواکي سره کتنې له کورونا سره د مبارزې په برخه کې مرسته کوي، له دې سره سره تمه کېږي چې خلک لازمو سپارښتنو ته پام وکړي.
په داسې حال کې چې د ژمي موسم نوی پیل شوی، د کورونا ویروس له امله د مړو شمېر په زیاتېدو دی او په تېرو دوو اونیو کې ۲۰۸ کوېد نولس ناروغان مړه شوي دي. همداراز په دې موده کې، دوه زره او ۸۲۸ نور په دې ناروغۍ اخته شوي دي. ددغو بېلګو په ثبتېدو په هېواد کې په کورونا د اخته وګړو شمېر ۴۹ زره او ۲۷۳ تنو ته رسېدلی دی. دا په داسې حال کې دي چې په تېرو دوو اونیو کې یوازې یو زر او ۶۵۱ تنه روغ شوي دي. په دې توګه د کووېد نولس د روغو شویو وګړو شمېر ۳۸ زره او ۳۸۴ تنو ته رسېږي. رسمي شمېرې ښيي چې اوسمهال په هېواد کې ۳۸ زره او ۳۸۴ د کورونا فعال ناروغان شته او دا شمېر د هرې ورځې په تېرېدو زیاتېږي.
د روغتیا د برخې مسوولین د روان وضعیت په اړه د اندېښنې په څرګندولو سره وايي چې تمه کېږي خلک روغتیايي سپارښتنو ته پام وکړي. د روغتیا وزارت مرستیال وحید مجروح د لیندۍ په ۲۳مه ۸صبح ته ویلې چې په افغانستان کې وضعیت تراوسه خطرناک نه دی، خو په هغه صورت کې چې ددې وزارت سپارښتنو ته پام ونه شي، خلک همکاري ونه کړي او پر شرایطو دقیقه څارنه ونه شي، د کورونایي وضعیت خرابېدل له امکانه لیرې نه دي. دا وزارت د قرنطین کولو موضوع هم د سختو ورځو لپاره په پام کې نیولې ده. له بلې خوا مسوولین وايي چې د شمېرو له مخې تراوسه د هېواد وضعیت د سیمې او نړۍ له هېوادونو سره نشي پرتله کېدای. هغه وویل: د وضعیت خرابېدو ته په پام سره تمه کېږي چې خلک روغتیايي سپارښتنو په تېره بیا د ماسک کارولو ته پام وکړي ځکه ککړه هوا دا اړتیا زیاتوي.
سربېره پر دې، ددغه وزارت چارواکي جوتوي چې په وروستیو اونیو کې د کورونا ویروس مثبتې پېښې او له دې امله د مړو شمېر زیات شوی دی. ددغه وزارت ویاندې معصومې جعفري ۸صبح ته وویل چې د عامې روغتیا وزارت د اټکل له مخې، که وضعیت دا ډول دوام وکړي، ښایي په راتلونکو اونیو کې وضعیت لاخراب شي. هغه وویل چې د کورونا له دوهمې څپې سره د مبارزې په طرحې کار روان دی او پر دغه ویروس د اخته کېدو د زیاتوالي د مخنیوي لپاره د ځینو مواردو وړاندیز شوی دی. مېرمن جعفري زیاتوي چې د دولتي کارکوونکو د ۵۰ سلنې حضور بحث هم د وړاندیز تر حده مطرح شوی، خو دا وزارت تمه لري دا طرحه د اداري اصلاحاتو له خوا چمتو او روښانه شي چې د کورونا ویروس په دوهمه څپه کې د دولتي کارکوونکو د کمښت وړاندیز ترکومه بریده عملي دی.
له بلې خوا، د عامې روغتیا وزارت باوري دي چې له کورونا سره مبارزه د سهار د ۸:۳۰ له ناستو سره ښه شوې ده. وحید مجروح زیاتوي چې که څه هم د کورونا په لومړي پړاو کې د حکومت ملاتړ اغېزناک و، خو په دغو ناستو کې د ولسمشر ګډون ددې لامل شوی چې کارونه په جدي توګه پرمخ ولاړ شي. د نوموړي په وینا، له کورونا سره په مبارزه کې د اړوندو بنسټونو په تیره بیا، مالیې وزارت او د تدارکاتو او سیمه ییزو ارګانونو د ادارو ونډه هم مرسته کوي چې په دې برخه کې اجرايي کارونه چټک شي. هغه زیاته کړې چې د سهار د ۸:۳۰ د ناستو ګټه د هغو بحثونو مطرح کول دي چې د بهرنۍ څارنې په پایله کې ترلاسه کېږي. دا ناستې له هغې وروسته کېږي چې ولسمشر د کورونا ویروس د دوهمې څپې په وړاندې د مبارزې مشري پرغاړه واخیسته. د ویلو ده چې د سهار د ۸:۳۰ ناستې هره یکشنبې او چهارشنبې ورځې په ولسمشرۍ ماڼۍ کې جوړېږي.
ښاغلي غني له دې مخکې د کورونا له دوهمې څپې سره د مبارزې په اړه ناستو کې لیرې پرتو ولایتونو ته د روغتیایي خدماتو پر رسولو په ټینګار سره ویلي چې باید په ولایتونو کې د کورونا ویروس بیړني حالات تعریف شي. هغه همداراز په دې برخه کې د عامه پوهاوي پر منظمې پراختیا ټینګار کړی دی. د ویلو ده چې شمېرې په رسمي توګه د عامې روغتیا وزارت له خوا اعلانېږي، خو له دې مخکې ویل شوي چې په دغه ویروس د اخته وګړو او مړو شمېر د دغه وزارت له ورکړ شویو شمېرو څخه زیات دی.