په کابل کې دوه ښځینه قاضیانې ترور شوې

ستره محکمه تاییدوي چې دوې ښځینه قاضیانو د مرغومي په ۲۸مه نېټه په کابل کې د ناپېژاندو وسله والو په برید کې ووژل شوې.
د سترې محکمې ویاند احمد فهیم قویم، ۸صبح ته ووېل چې په دغه برید کې دوې ښځینه قاضیانې ووژل شوې او موټر چلوونکی یې ټپي شوی دی.
د کابل د امنیه قوماندانۍ ویاند فردوس فرامرز هم وایي چې دا پېښه د یکشنبې ورځې سهار مهال د کابل په قلعه فتح الله سیمه کې وشوه.
هغه زیاته کړه چې ناپېژانده وسله والو د دغو قاضیانو پر موټر برید وکړ.
تراوسه کوم کس یا ډلې ددې برید مسوولیت نه دی منلی.
د کابل پولیس وایي تراوسه د برید عاملین نه دي نیول شوي او په دې اړه د دوی څېړنې روانې دي.
په وروستیو ورځو کې په کابل کې هدفي وژنې زیاتې شوې دي.
که څه هم د ډېری دغو بریدونو مسوولیت څوک پر غاړه نه اخلي، خو افغان امنیتي چارواکي طالبان ددغو پېښو مسوول بولي.