د یما سیاوش له وژل کېدو دوه کاله وروسته؛ پر بشري حقونو د څار بنسټ: افغانستان کې عدالت نشته
۸صبح، کابل: د طلوعنیوز د پخواني خبریال او ویاند یما سیاوش له وژل کېدو دوه کاله وروسته پر بشري حقونو د څار بنسټ افغانستان کې د خبریالانو پروړاندې د تاوتریخوالو دوسیو ته د پاملرنې په برخه کې پر بېعدالتۍ سخته نیوکه کړې ده.
پر بشري حقونو د څار بنسټ دوشنبه د لړم پر ۱۶ د یوه راپور په خپرولو ویلي، چې د یما سیاوش پر موټر د چاودنې په اړه عدالت نه دی پلي شوی.
پر بشري حقونو د څار بنسټ په وینا سیاوش په خپلو مرکو کې د اشرف غني په حکومت کې فساد افشا کاوه.
دغه سازمان وایی، چې د ۱۴۰۰ په زمري میاشت کې پر افغانستان د طالبانو له واکمنېدو سره عدالت ته لاسرسی لا محدود شوی دی، ځکه دغې ډلې قضايي سیستم له منځه وړی او د خبریالانو پروړاندې تاوتریخوالي ته دوام ورکوي.
پر بشري حقونو د څار بنسټ د ملګروملتونو سازمان د شمېرو له مخې ویلي، چې له ۲۰۱۸ کال څخه تر ۲۰۲۱ پورې افغانستان کې لږترلږه ۳۳ رسنیز کارکوونکي وژل شوي، چې د دغو وژنو ډیری مسوولیت طالبانو او داعش پرغاړه اخیستی دی.
پر بشري حقونو د څاربنسټ وایي، چې د یما سیاوش وژل کېدل او پر خبریالانو نور بریدونه باید په هره څېړنه کې لومړیتوب ولري.
د طلوعنیوز پخوانی خبریال او نطاق یما سیاوش د ۲۰۲۰ کال د نومبر پر ۷ په موټر کې د ځایپرځای شوي ماین په چاودنه کې ووژل شو. د هغه د مړینې د څرنګوالي په اړه څېړنې کومې پایلې ته ونهرسېدې؛ ځکه د اشرف غني د حکومت پرمهال د افغانستان بانک چې یما سیاوش یې کارکوونکی و په دې برخې کې په سمه توګه همکاري ونهکړه.
